ՔՊ վերնախավին՝ Նիկոլ Փաշինյանի գլխավորությամբ, խորհուրդ կտամ մեկ շաբաթ ապրել սահմանամերձ գյուղում, եթե վստահ են, որ կրակոցները հայկական ուղղությամբ չեն. Հայկ Նահապետյան
Վերջին շաբաթների ընթացքում Ադրբեջանը մի կողմից՝ կրակում է ՀՀ սահմանամերձ գյուղերի, հայկական դիրքերի ուղղությամբ, մյուս կողմից՝ ապատեղեկատվություն տարածում, թե ՀՀ զինված ուժերի ներկայացուցիչներն են իրենց ուղղությամբ կրակ արձակում։
Այն, որ ադրբեջանական կողմը կրակում է, օրերս Կառավարության հետ հարցուպատասխանի ժամանակ խորհրդարանում հայտարարեց նաև Պաշտպանության նախարար Սուրեն Պապիկյանը՝ ասելով. «Հայաստանի սահմաններին կան կրակոցներ, սակայն դրանք Հայաստանի ուղղությամբ չեն»։
Սյունիքի մարզի Խնածախ, Խոզնավար գյուղերի բնակիչները հաստատել են, որ ադրբեջանական կողմից կրակում են հենց գյուղերի ուղղությամբ։
Անվտանգային և ռազմական հարցերով փորձագետ Հայկ Նահապետյանի խոսքով՝ Ադրբեջանի կողմից էսլակացիայի վտանգը մեծ է։ Իսկ Պաշտպանության նախարարի հայտարարության վերաբերյալ մեկնաբանություններն ավելորդ են, որովհետև տրամաբանություն չկա։
«Եթե այս տրամաբանությամբ առաջնորդվենք, ապա, եթե վաղն Ադրբեջանը հարձակվի, կարող են ասել, թե սխալվել են, ճանապարհը շփոթել են և, ասենք՝ մի 20 կմ մտել են ՀՀ տարածք։ Եթե հիշում եք, երբ ադրբեջանցիներն առաջին անգամ հայտնվեցին Սև լճի տարածքում, հայկական կողմից հրաման եղավ չկրակել, իսկ Սյունիքի այն ժամանակվա մարզպետն ասել էր, թե ադրբեջանցիները մոլորվել են»,- 168.am-ի հետ զրույցում հիշեցրեց Հայկ Նահապետյանը։
Նա վստահ է՝ Ադրբեջանը նման կրակոցներով փորձում է ազդել սահմանամերձ գյուղերի բնակիչների հոգեբանության վրա, նրանք մշտապես անորոշության մեջ են լինելու՝ մտածելով՝ կրակոցներին կհետևի՞ հարձակում, թե՞ չէ, հաճախակի կդառնա՞ն այդ կրակոցները, թե՞ ոչ։
«Այս մարդկանց վիճակը պատկերացնելու համար՝ ես ՔՊ-ի վերնախավին՝ Նիկոլ Փաշինյանի գլխավորությամբ, խորհուրդ կտամ մեկ շաբաթ ապրեն սահմանին գտնվող գյուղերում, լսեն այս կրակոցները։ Եթե վստահ են, որ ադրբեջանցիները հայկական կողմի վրա չեն կրակում, թող գնան ու ապրեն։
Ադրբեջանը նաև բնակիչներին սովորեցնում է իր կրակոցներին, մարդկանց զգոնությունը բթացնելու միտում ունեն, այդպես կշարունակի ու հանկարծ մի օր կհարձակվի, երբ բնակիչները դրան չեն սպասի»,- հավելեց Հայկ Նահապետյանը։
Այս համատեքստում իզուր չեն Ադրբեջանից հնչող հայտարարությունները, որ՝ «խաղաղության համաձայնագիրը կստորագրվի միայն ՀՀ Սահմանադրությունը փոխելուց հետո, որին պետք է հաջորդի ադրբեջանցի փախստականների վերադարձ, փոխհատուցում և ռազմական տուգանք վճարեն, Արցախի ազատամարտին մասնակցած մարդկանց հանձնում» և այլն։ Այս բոլոր պահանջները, որոնք ուղեկցվում են ճնշումներով՝ կրակոցները դրա ապացույցներից մեկն է, հանգեցնելու են էսկալացիայի։
«Նիկոլ Փաշինյանը լավ գիտի, եթե Ադրբեջանի կողմից եղավ էսլակացիա, դժվար թե դա հանդիպի լուրջ դիմադրության, որովհետև երբ Նիկոլ Փաշինյանը Տավուշ էր գնացել, հայտարարում էր, թե՝ «եթե Ադրբեջանի ասածը չանենք՝ պատերազմ կլինի»։ Էսկալացիայի դեպքում էլ նույնը կասի։
Ինչո՞ւ Փաշինյանը չմասնակցեց ՀԱՊԿ 3 զորավարժություններին, զորավարժությունները մարտից առաջ վերջին քննությունն է, որպեսզի բացթողումները հասկանա։ Փաշինյանը չի մասնակցում, որպեսզի հանգիստ տարածքներ զիջի Ադրբեջանին»,- ընդգծեց Հայկ Նահապետյանը։
