Պենտագոնը մինչև 1500 զինծառայող կուղարկի Մեքսիկայի սահման․ AP
Associated Press-ի փոխանցմամբ՝ ԱՄՆ պաշտոնյաները չորեքշաբթի օրը հայտնել են, որ Պենտագոնը առաջիկա օրերին կսկսի մինչև 1500 ակտիվ ծառայության զինծառայողների տեղակայումը հարավային սահմանի անվտանգությունն ապահովելու համար:
Այսպիսով՝ գործողության մեջ են դրվում ԱՄՆ նախագահ Դոնալդ Թրամփի՝ միգրացիայի դեմ պայքարի ծրագրերը, որոնք շարադրված են նրա պաշտոնավարումից հետո հրապարակված հրամաններում:
Ակնկալվում է, որ պաշտպանության նախարարի պաշտոնակատար Ռոբերտ Սալեսսեսը չորեքշաբթի օրը կստորագրի տեղակայման հրամաններ, սակայն դեռ հայտնի չէ, թե որ զորքերը կամ ստորաբաժանումներն են ուղարկվելու, և ընդհանուր թիվը կարող է տատանվել:
Դեռ հայտնի չէ նաև՝ արդյոք նրանք ի վերջո կզբաղվեն իրավակարգի պահպանությամբ, ինչը ամերիկյան զորքերին կդնի նորագույն պատմության մեջ աննախադեպ նոր դերում:
Ակտիվ ծառայության զինծառայողները կմիանան մոտ 2500 ԱՄՆ Ազգային գվարդիայի զինծառայողներին և պահեստազորայիններին, որոնք արդեն այնտեղ են: Ներկայումս սահմանին ակտիվ ծառայության զինծառայողներ չկան: Ակնկալվում է, որ այս ուժերը կօգտագործվեն սահմանապահ ծառայության աշխատակիցներին նյութատեխնիկական ապահովման, տրանսպորտային և արգելապատնեշների կառուցման հարցերում աջակցելու համար: Նրանք նման պարտականություններ են կատարել անցյալում, երբ և՛ Թրամփը, և՛ նախկին նախագահ Ջո Բայդենը ակտիվ ծառայության զորքեր են ուղարկել սահման: Օրենքով զորքերին արգելվում է սահմանին իրավապահ գործառույթներ իրականացնել, սակայն դա կարող է փոխվել: Թրամփը իր հրամանով ԱՄՆ նոր պաշտպանության նախարարին և ազգային անվտանգության նոր ղեկավարին պարտավորեցրել է 90 օրվա ընթացքում հաշվետվություն ներկայացնել, եթե նրանք գտնեն, որ պետք է կիրառել 1807 թվականի «Ապստամբության մասին» օրենքը: Սա թույլ կտա այս զորքերը օգտագործել քաղաքացիական իրավապահ մարմիններում ԱՄՆ տարածքում:
