Թրամփը իր հիացմունքն է արտահայտել Էրդողանի նկատմամբ՝ Սիրիան գրավելու հարցում և նրան իր ընկերն է անվանել
ԱՄՆ նորընտիր նախագահ Դոնալդ Թրամփը երեքշաբթի օրը իր հիացմունքն է հայտնել նախագահ Ռեջեփ Թայիփ Էրդողանի նկատմամբ՝ նրան անվանելով «ընկեր» և մարդ, ում «հարգում եմ»։
«Նախագահ Էրդողանն իմ ընկերն է. նա մեկն է, ով ինձ դուր է գալիս, ում ես հարգում եմ: Կարծում եմ՝ նա էլ է ինձ հարգում»,- ասել է նա։
Ֆլորիդայում Մար-ա-Լագոյի իր նստավայրում մամուլի ասուլիսի ժամանակ
Թրամփը քննարկել է իր արտաքին քաղաքականության օրակարգը: Անդրադառնալով իր նախորդ նախագահությանը՝ Թրամփը նշել է պատերազմները կանխելու իր ջանքերը և պատասխանել է Սիրիայից ամերիկյան զորքերի դուրսբերման վերաբերյալ հարցերին՝ ընդգծելով այդ գործընթացում Թուրքիայի դերը։ Թրամփն ասել է, որ իր առաջին պաշտոնավարման ընթացքում հաղթել է ԻՊ-ին Սիրիայում և ամերիկյան զորքերի մեծ մասը դուրս է բերել երկրից։ Երբ նրան հարցրել են ներկա իրավիճակի մասին, նա ընդգծել է Անկարայի կարևորությունը այդ հարցում՝ գրում է Dailysabah-ը։
Սիրիայից մոտ 2000 ամերիկացի զինվորականների դուրսբերման վերաբերյալ հարցերին ի պատասխան՝ Թրամփը ասել է. «Ես այդ մասին ձեզ ոչինչ չեմ ասի, քանի որ դա ռազմավարության մաս է, բայց կասեմ, որ դա Թուրքիան է եղել։ Բայց եթե նայեք, թե ինչ կատարվեց Սիրիայի հետ, Ռուսաստանը թուլացավ, Իրանը թուլացավ։ Եվ նա (նախագահ Էրդողանը) շատ խելացի տղա է, և նա իր մարդկանց ուղարկեց այնտեղ տարբեր ձևերով և տարբեր անուններով, և նրանք մուտք գործեցին և ստանձնեցին իշխանությունը», – հավելել է Թրամփը։
