Դատարանը մերժել է Հարավային Կորեայի նախագահի կալանավորման որոշումն անվավեր ճանաչելու միջնորդությունը
Սեուլի Արևմտյան շրջանային դատարանը մերժել է Հարավային Կորեայի նախագահ Յուն Սեոկ Յոլի դեմ կալանավորման օրդերն անվավեր ճանաչելու համար միջնորդությունը:
Այս մասին հայտնում է «Yonhap» գործակալությունը։
Դեկտեմբերի 31-ին դատարանը նրան կալանավորելու որոշում էր կայացրել։
Յուն Սեոկ Յոլի փաստաբանները բողոք են ներկայացրել՝ խնդրելով անվավեր ճանաչել որոշումը՝ պատճառաբանելով, որ այն տարածվում է անվտանգության հատուկ ռեժիմ ունեցող տարածքի վրա:
Փաստաբանների կարծիքով՝ դատավորը սխալ եզրակացություն է արել, քանի որ քրեական օրենսգրքով նախատեսված հատուկ անվտանգության ռեժիմ ունեցող տարածքներում, այդ թվում՝ ռազմական օբյեկտներում, խուզարկությանն ու ձերբակալությանը վերաբերող դրույթը չի տարածվում նախագահի և նրա նստավայրի վրա։
Յուն Սեոկ Յոլի փաստաբանները մտադիր են բողոք ներկայացնել դատախազություն՝ հակակոռուպցիոն վարչության ղեկավարի և համատեղ քննչական խմբի 150 ներկայացուցչի դեմ, որոնք հունվարի 3-ին փորձել են ձերբակալել նախագահին։
Ըստ փաստաբանների՝ քննիչներն ապօրինի ներխուժել են մասնավոր տարածք, խախտել հատուկ պահպանվող ռազմական տարածքների կանոնակարգերը։
