Աժ-ում ստացել են հերթական պարգևավճարները՝ այս ամիս արդեն երկրորդ անգամ
ԱԺ նախագահ Ալեն Սիմոնյանը հերթական կարգադրությունն է ստորագրել՝ ԱԺ աշխատակազմի պետական ծառայողներին և աշխատողներին միանվագ դրամական պարգևատրմամբ խրախուսելու վերաբերյալ։
Կարգադրությունը հրապարակվել է ԱԺ պաշտոնական կայքում.
«Ղեկավարվելով «Ազգային ժողովի կանոնակարգ» սահմանադրական օրենքի 5-րդ հոդվածի 2-րդ մասի 12-րդ և 22-րդ կետերով՝ կարգադրում եմ.
Ազգային ժողովի աշխատակազմի պետական ծառայողներին և աշխատողներին խրախուսել միանվագ դրամական պարգևատրմամբ՝ համաձայն հավելվածի:
Ազգային ժողովի աշխատակազմի ղեկավար-գլխավոր քարտուղար Դ. Առաքելյանին՝ Հայաստանի Հանրապետության օրենսդրությամբ սահմանված կարգով ապահովել համապատասխան վճարումների կատարումը»:
Հիշեցնենք, որ այս ամիս սա երկրորդ պարգևատրումն է ԱԺ-ում։ Դեռևս դեկտեմբերի սկզբին Ամանորի ու Սուրբ Ծննդյան տոների կապակցությամբ պարգևատրվել էին ԱԺ պատգամավորները։
Այս համատեքստում հարկ է հիշեցնել, որ հանրակրթական դպրոցներում կամավոր ատեստացիան անցած ուսուցիչները նոյեմբեր և դեկտեմբեր ամիսների համար չեն ստացել ըստ իրենց հավաքած միավորների բարձր աշխատավարձը։
Շատերին ասել են, որ բյուջեում գումար չկա, իսկ ահա պարգևավճարների համար բյուջեում փող կա։
