«Երևան ավտոբուս» ՓԲԸ-ն մինչև ականջների ծայրը թաթախված է կոռուպցիայի մեջ․ ավագանու անդամ
Այսօր «Երևան ավտոբուս» ՓԲԸ-ն մինչև ականջների ծայրը թաթախված է կոռուպցիայի մեջ։ Երևանի ավագանու նիստում այս մասին հայտարարեց «Մայր Հայաստան» խմբակցության անդամ Մեսրոպ Մանուկյանը։
ՀՀ մշակութային գործիչներին Երևանի պատվավոր քաղաքացու կոչում շնորհելու համատեքստում ունեցած իր ելույթում Մանուկյանը նշեց`շատ կցանկանար, որ Երևանի պատվավոր քաղաքացու կոչում ստացած մտավորականները լինեն նաև մտահոգ քաղաքացիներ ու զբաղվեն քաղաքի խնդիրներով։
«Իրենք պետք է հասկանան, թե ոնց է հունվարի 1-ից տրանսպորտի մոտ 300 դրամ ուղեվճարը գոյացել, նրանք պետք է իմանան, որ քաղաքապետարանը ավտոբուսների մեջ կամերա է դրել, բայց դրանք չեն աշխատում, որ քաղաքապետարանը ստվերի դեմ կեղծ պայքար է տանում։ Իրենք պետք է գան ու հասկանան, որ «Ժոնգ տոնգ» մակնիշի ավտոբուսները, որ էն բոյով քաղաքապետն (նկատի ունի Հրաչյա Սարգսյանին,-խմբ) առնում էր թանկ գնով, Հայաստան էր բերվում և տեխնիկական պարամետրերը չէին համապատասխանում պահանջներին, 2 նստարան չկար ու լիքը խնդիրներ կային։ Ո՞նց եղավ, որ այդ խնդիրներով ավտոբուսները քաղաքապետարանն ընդունեց»,-ասաց Մանուկյանը։
Նա ընդգծեց` քաղաքում խոսում են, որ «Ժոնգ տոնգ» մակնիշի ավտոբուսները սպասարկում է Հրաչյա Սարգսյանին փոխկապակցված ընկերությունը։
Իր խոսքում ավագանու անդամը հույս հայտնեց, որ Երևանի պատվավոր քաղաքացիները կմասնակցեն քաղաքի կառավարմանը, իրենց հեղինակավոր խոսքն ասեն, այլ ոչ թե միայն կվայելեն իրենց կոչումը։
