Նասրալլահի նահատակությունը մեծ կորուստ է, բայց դա չի նշանակում դիմադրության ավարտ. Իրանի ԱԳ նախարար
Լիբանանյան «Հեզբոլլահ» շարժման գլխավոր քարտուղար Սեյեդ Հասան Նասրալլահի նահատակությունը չի նշանակում սիոնիստական ռեժիմին դիմադրության ավարտ. այս մասին հայտարարել է Իրանի ԱԳ նախարար Աբբաս Արաղչին «Ալ-Մայադին» ցանցին տված հարցազրույցում
«Սեյեդ Հասան Նասրալլահի նահատակությունը մեծ կորուստ է, բայց դա չի նշանակում դիմադրության ավարտ, այլ այն ավետում է նոր գլխի սկիզբը, որը լի է ավելի մեծ ուժով»։
Նշենք, որ «Հեզբոլլահ»-ը պաշտոնապես հաստատել է գլխավոր քարտուղար Հասան Նասրալլահի զոհվելը սեպտեմբերի 27-ին Բեյրութում «Հեզբոլլահ»-ի կենտրոնակայանի վրա Իսրայելի թիրախային ավիահարվածի հետևանքով։
ԱՄՆ նախագահ Ջո Բայդենը Նասրալլահի սպանությունը «արդար» է որակել:
«Հասան Նասրալլահը և նրա գլխավորած ահաբեկչական խմբավորումը՝ «Հեզբոլլահ»-ը, պատասխանատու են չորս տասնամյակ ահաբեկչության ընթացքում հարյուրավոր ամերիկացիների սպանության համար: Իսրայելի ավիահարվածից նրա մահը արդարության միջոց է նրա բազմաթիվ զոհերի, այդ թվում հազարավոր ամերիկացիների և իսրայելցիների համար:
Հարվածը, որը սպանեց Նասրալլահին, հասցվել է 2023 թվականի հոկտեմբերի 7-ին ՀԱՄԱՍ-ի սպանդով սկսված հակամարտության ավելի լայն համատեքստում: Հաջորդ օրը Նասրալլահը ճակատագրական որոշում կայացրեց՝ միավորվել ՀԱՄԱՍ-ի հետ և բացել, իր բնորոշմամբ, «հյուսիսային ճակատ» Իսրայելի դեմ:
Միացյալ Նահանգները լիովին պաշտպանում է Իսրայելի իրավունքը՝ պաշտպանվելու «Հեզբոլլահ»-ից, ՀԱՄԱՍ-ից, հութիներից և Իրանի կողմից աջակցվող ցանկացած այլ ահաբեկչական խմբավորումներից: Հենց երեկ ես պաշտպանության նախարարին հանձնարարել եմ էլ ավելի ամրապնդել ԱՄՆ-ի բանակի պաշտպանական դիրքերը Մերձավոր Արևելքի տարածաշրջանում՝ զսպելու ագրեսիան և նվազեցնելու ավելի լայն տարածաշրջանային պատերազմի վտանգը», – նշել է Բայդենը:
