Գրոսին ասել է, որ Իրանի հետ միջուկային գործարքն անհնար է առանց ԱՄՆ-ի մասնակցության

Իրանի հետ միջուկային գործարքը հնարավոր չէ առանց ԱՄՆ-ի մասնակցության, որը կենտրոնական դեր է խաղում բանակցային գործընթացում։ Այդ մասին հայտնել է ՄԱԳԱՏԷ-ի գլխավոր տնօրեն Ռաֆայել Գրոսին։

Գրոսին հավելել է, որ Իրանի և ԱՄՆ-ի միջև բանակցությունները, ամենայն հավանականությամբ, ընթանում են միջնորդների միջոցով։ Միաժամանակ նա նշել է ՄԱԳԱՏԷ-ի անբաժանելի դերը, քանի որ իրանական միջուկային օբյեկտներում ներկա են միայն նրա տեսուչները։

Գրոսիի խոսքով՝ ՄԱԳԱՏԷ-ն մասամբ կորցրել է Իրանի միջուկային ծրագրի մոնիթորինգի հնարավորությունը, և ինքը մտադիր է շուտով այդ հարցը քննարկել Թեհրանի ներկայացուցիչների հետ։

2015 թվականին Մեծ Բրիտանիան, Գերմանիան, Չինաստանը, Ռուսաստանը, ԱՄՆ-ն, Ֆրանսիան և Իրանը կնքեցին միջուկային համաձայնագիր, որը ներառում էր պատժամիջոցների վերացում՝ Իրանի միջուկային ծրագրի սահմանափակումների դիմաց: 2018 թվականի մայիսին Միացյալ Նահանգները, որտեղ նախագահն էր Թրամփը, դուրս եկավ համաձայնագրից և վերականգնեց Թեհրանի դեմ պատժամիջոցները։ Ի պատասխան՝ Իրանը հայտարարեց համաձայնագրով ստանձնած իր պարտավորությունների աստիճանական կրճատման մասին՝ հրաժարվելով միջուկային հետազոտությունների, ցենտրիֆուգների և ուրանի հարստացման սահմանափակումներից։