Բայդենը հայտնել է, որ «փոխանցում է ջահը նոր սերնդին»՝ ժողովրդավարությունը պաշտպանելու համար

ԱՄՆ նախագահ Ջո Բայդենն ընտրապայքարից դուրս գալու մասին հայտարարությունից հետո առաջին անգամ դիմել է ժողովրդին՝ իր որոշումը բացատրելով նրանով, որ թույլ է տալիս նոր սերնդին՝ շարունակել իր գործը։

ԱՄՆ նախագահը հայտնել է, որ դա լավագույն միջոցն է՝ միավորելու երկիրը։

«Ես հարգում եմ այս պաշտոնը, բայց իմ երկիրն ավելի շատ եմ սիրում…. Ոչինչ չի կարող կանգնել ժողովրդավարությունը փրկելու ճանապարհին։ Դա ներառում է նաև անձնական նկրտումները: Այնպես որ, ես եկել եմ այն որոշման, որ առաջ գնալու լավագույն ուղին ջահը նոր սերնդին փոխանցելն է։ Դա լավագույն միջոցն է՝ միավորելու մեր ազգը», – նշել է ԱՄՆ նախագահը։

Նա գովաբանել է փոխնախագահ Քամալա Հարիսին, որին հաջողվել է դեմոկրատ պատվիրակների կողմից բավարար աջակցություն ստանալ՝ որպես նախագահի թեկնածու առաջադրվելու համար։

«Նա ուժեղ է։ Նա ունակ է։ Նա եղել է անհավանական գործընկեր ինձ համար և առաջնորդ՝ մեր երկրի համար», – նշել է Բայդենը։ Բայդենը խոսել է նաև այն վտանգի մասին, որում, իր կարծիքով, կհայտնվեն ամերիկացիները, եթե նախկին նախագահ Դոնալդ Թրամփը հաղթի ընտրություններում, սակայն նա չի նշել Թրամփի անունը։

«Ամերիկայի առումով հիանալի է այն, որ այստեղ թագավորներն ու բռնապետները չեն իշխում։ Ժողովուրդն է իշխում։ Պատմությունը ձեր ձեռքերում է, Ամերիկայի գաղափարը ձեր ձեռքերում է», – նշել է նա։

11-րոպեանոց ելույթում ԱՄՆ նախագահն անդրադարձել է պաշտոնավարման ընթացքում իր ձեռքբերումներին, ինչպես նաև այն նպատակներին, որոնց հույս ունի հասնել մինչև իր նախագահության ժամկետի ավարտը, այդ թվում՝ Գերագույն դատարանի բարեփոխումներին, Գազայում ընթացող պատերազմի ավարտին, ԱՄՆ-ի դաշնակիցների հետ հարաբերությունները պահպանելուն։

«Մենք կշարունակենք համախմբել հպարտ երկրների կոալիցիան, որպեսզի թույլ չտանք (ՌԴ նախագահ Վլադիմիր) Պուտինին նվաճել Ուկրաինան և ավելի շատ վնաս պատճառել։ Մենք ավելի կուժեղացնենք ՆԱՏՕ-ն, և ես այն ավելի հզոր կդարձնեմ և ավելի միասնական, քան երբևէ մեր ամբողջ պատմության ընթացքում։ Ես նույնը կշարունակեմ անել Խաղաղ օվկիանոսում մեր դաշնակիցների համար», – ասել է Բայդենը։  Բայդենը ԱՄՆ առաջին գործող նախագահն է, որը չի ձգտում վերընտրման 1968 թվականից ի վեր, երբ Լինդոն Ջոնսոնը Վիետնամի պատերազմի համար քննադատության ենթարկվելուց հետո հանկարծակի դուրս եկավ ընտրապայքարից։