Հայաստանն Արցախով այլ քաշային կատեգորիա էր միջազգային հարաբերություններում, Հայաստանն առանց Արցախի` այլ. Էդուարդ Աբրահամյան
Անվտանգային վերլուծությունների ինստիտուտը ներկայացնող քաղաքագետ Էդուարդ Աբրահամյանը ֆեյսբուքյան իր էջում գրել է.
«Ուժը միջազգային հարաբերությունների արտարժույթն է։
Չունես ուժ, կամ ունակ չես, կամ ցանկություն չունես այն գեներացնել և կուտակել, այնուհետև դնել այն դիվանագիտության և պետական ռազմավարական շահերի սպասարկման հիմքում` անելիք չունես միջազգային հարաբերություններում։
Միջազգային իրավունքը միջազգային հարաբերությունների գործիքներից մեկն է։ Այն նույնպես խարսխված է ուժի ու ուժի կիրառման պոտենցիալի/պատրաստակամության վրա։ Չկա ուժ` չկա միջազգային իրավունք։ Չկա ուժային բալանս միջազգային հարաբերություններում` չկա միջազգային իրանունք։ Եթե ունակ ես ակումուլացնել ուժ և կապիտալիզացնել այն, և պետք եղած դեպքում ցուցադրել կամ կիրառել այն` ուրեմն ունակ ես նաև օգտագործել միջազգային իրավունքը հոգուտ քեզ և քո ռազմավարական շահերի։
Թույլը, տկարն ու անճարը միջազգային իրավունքից չի օգտվում։
Սովորենք տարբերել և տարբերակել միջազգային հարաբորությունները միջազգային իրավունքից։ Վերջինս ենթարկվում է առաջինի կողմից առաջ քաշված կառուցվածքային օրակարգերին, եթե չասենք՝ քմահաճույքներին։
Ինչպես արդարությունն ինքն իրենով չի վերականգնվում առանց կոնկրետ վերականգնող ունեցողի, այնպես էլ միջազգային իրավունքը ինքն իրենով չի աշխատում միջազգային հարաբերություններում։ Աշխատեցնող է պետք։
Եվ այո. Հայաստանն Արցախով այլ քաշային կատեգորիա էր միջազգային հարաբերություններում, Հայաստանն առանց Արցախի` այլ»։
