Իրանի և Թուրքիայի մաքսային ծառայությունների ղեկավարները քննարկել են 12 համատեղ ծրագրերի իրականացումը
Իրանի և Թուրքիայի մաքսային ծառայությունների ղեկավարները համատեղ հանդիպման ժամանակ ընդգծել են երկու երկրների միջև 12 օպերատիվ ծրագրի շրջանակներում առևտրատնտեսական հարաբերությունների զարգացման և կարգավորման անհրաժեշտությունը։
Իրանի մաքսային վարչության (IRICA) նախագահ Մոհամադ Ռեզվանիֆարը և Թուրքիայի առևտրի փոխնախարար և մաքսատան տնօրեն Սեզայ Ուքարմաքը կարևորել են երկու կողմերի միջև նախկինում ստորագրված համաձայնագրերի և փոխըմբռնման հուշագրերի իրականացումը, ինչպես նաև նոր օպերատիվ ծրագրերի կնքումը։
Հանդիպման ընթացքում IRICA-ի ղեկավարը մատնանշել է Թուրքիայի հատուկ դիրքորոշումը այլ երկրների հետ Իրանի առևտրատնտեսական հարաբերություններում և հավելել, որ համաձայնագրերի ու փոխըմբռնման հուշագրերի դրույթների իրականացումը և նոր օպերատիվ ծրագրերի մշակումը կարևոր նշանակություն ունեն, հաղորդում է Mehr-ը։
«Նա նաև հիշատակել է երկկողմ առևտրային փոխանակումները բարելավելու և դյուրացնելու համատեղ գործողությունների ծրագրերը և ընդգծել երկու երկրների սահմանային մաքսային ծառայությունների ղեկավարների միջև համատեղ սահմանային հանդիպումների հետևողական անցկացման կարևորությունը՝ ուղղված առևտրատնտեսական գործունեության դյուրացմանը, համատեղ սահմաններից բեռնատարների տարանցման և այլնի դեպքում երկու երկրների սահմանային մաքսակետերի գործողությունների համակարգմանը»,- գրում է իրանական լրատվամիջոցը։
Կողմերի միջև քննարկված հարցերի թվում են եղել հարևան Թուրքիայի հետ ընդհանուր սահմանին գտնվող մաքսակետերում շուրջօրյա որակյալ ծառայությունների մատուցումը, Իրանի և Թուրքիայի մաքսատների միջև էլեկտրոնային փաստաթղթերի հետևողական փոխանակման վերսկսումը, Բազարգանի սահմանին էլեկտրոնային TIR-ի ներդրման և միացման համակարգումը և ՄԱԿ-ի տնտեսական հանձնաժողովի ներկայացուցիչների ներկայությունը մաքսատանը, նշում է իրանական լրատվամիջոցը։
