«Հարցն ուղղեք Միացյալ Թագավորության պաշտոնյաներին». ԱԳ փոխնախարարը չմեկնաբանեց Մեծ Բրիտանիայի ՊՆ հայտարարությունը
![](https://168.am/wp-content/uploads/2023/10/Paruyr-Hovhannisyan.png)
Հայաստանի արտաքին գործերի փոխնախարար Պարույր Հովհաննիսյանն այսօր խորհրդարանում լրագրողների հետ զրույցում ասաց, որ արդեն երկար ժամանակ է, ինչ հայկական կողմը բարձրաձայնել է իր ցանկությունը՝ մերձենալու ԵՄ-ի հետ, այնքան, ինչքան դա հնարավոր է։
«Մեր գործընկերությունը ԵՄ-ի հետ երբեք նման ինտենսիվ մակարդակի չի եղել, բնական է, որ մեր առջև բոլոր հնարավոր տարբերակները քննարկման են։ Իհարկե, այդ գործընթացը մենք տանում ենք ԵՄ-ի հետ համատեղ, և ինչպես նշեց Նիկոլ Փաշինյանը՝ ՀՀ շահերից բխող բոլոր որոշումները կընդունվեն անհրաժեշտության դեպքում»,- շեշտեց Պ. Հովհաննիսյանը։
ԱԳ փոխնախարարը չհստակեցրեց՝ օրակարգում ԵՄ-ին անդամակցելու հարց կա՞, թե՞ ոչ, նշելով, որ հարցին արդեն պատասխանել է։
«Այս պահին այն է, ինչի մասին արդեն ասացի»,- հավելեց նա։
Փոխնախարարը նաև տեղեկացրեց՝ այս պահին քննարկում են այն բոլոր տարբերակները, որոնք կնպաստեն ՀՀ ինքնիշխանության ամրապնդմանը, զարգացմանը, տնտեսության դիվերսիֆիկացիային և մի շարք այլ հարցերի։ Բոլոր հարցերը դիտում ենք միայն այդ տեսանկյունից, և մեր գործընկերությունը ԵՄ-ի հետ միայն համատեղում ենք մեր ազգային շահերի հետ»,- ընդգծեց նա։
Պարույր Հովհաննիսյանը նաև չմեկնաբանեց Մեծ Բրիտանիայի պաշտպանության նախարարի հայտարարությունը, որ պատրաստ է աջակցել Հայաստանին՝ Ռուսաստանից եկող սպառնալիքների դեպքում, հորդորելով այդ հարցն ուղղել Միացյալ Թագավորության պաշտոնյաներին։
Նա նաև չպատասխանեց հարցին, թե ՌԴ-ից ՀՀ-ին ինչ վտանգ կարող է սպառնալ, կրկին նշելով, որ հարցը պետք է ուղղել Մեծ Բրիտանիայի պաշտոնյաներին։