Մակրոնը ևս մեկ անգամ հետաձգել է այցն Ուկրաինա
Ֆրանսիայի նախագահ Էմանուել Մակրոնը երրորդ անգամ հետաձգել է պլանավորված այցն Ուկրաինա։ Ըստ Ելիսեյան պալատի՝ նախագահի այցը կկայանա առաջիկա շաբաթներին։ Այս մասին հաղորդում է Reuters գործակալությունը։
Մակրոնն Ուկրաինա պետք է այցելեր փետրվարին, սակայն այցը հետաձգվեց, քանի որ այդ երկրի նախագահ Վլադիմիր Զելենսկին ինքն այցելեց Փարիզ՝ անվտանգության ոլորտում համագործակցության համաձայնագիր կնքելու։
Ըստ դիվանագետների՝ այնուհետև Մակրոնի այցը պլանավորվել էր մարտի սկզբին, որից հետո հետաձգվել էր մինչև այս շաբաթվա վերջ։
Ֆրանսիայի ղեկավարի ուղևորության հետաձգումը կարող է պայմանավորված լինել անվտանգության նկատառումներով։ Օրերս Օդեսայում Ուկրաինայի նախագահի և Հունաստանի վարչապետի հանդիպման ժամանակ երկու ղեկավարներից ընդամենը մի քանի հարյուր մետր հեռավորության վրա ռուսական հրթիռ էր ընկել։ Մակրոնը նույնպես պետք է այցելեր Օդեսա։
Հիշեցնենք, որ այսօր ավելի վաղ AFP գործակալությունը՝ հղում անելով Ելիսեյան պալատին, գրել էր, որ Ֆրանսիայի նախագահ Էմանուել Մակրոնն առաջիկա շաբաթներին կայցելի Կիև։
Գործակալության փոխանցմամբ՝ այս որոշման մասին հայտարարվել է Մակրոնի և Ուկրաինայի նախագահ Վլադիմիր Զելենսկու՝ կիրակի օրը կայացած հեռախոսազրույցից հետո։
Ըստ AFP-ի զրույցի ընթացքում երկու երկրների ղեկավարները վերահաստատել են տարբեր ոլորտներում համագործակցության ամրապնդման իրենց հանձնառությունը՝ ներառյալ կիբերանվտանգությունը, ականազերծումը և զենքի արտադրությունը։
