ԵՄ-ն մտադիր է ՌԴ-ի դեմ պատժամիջոցների 13-րդ փաթեթն ընդունել փետրվարի 24-ին
Եվրամիությունը պլանավորում է հակառուսական պատժամիջոցների 13-րդ փաթեթն ընդունել փետրվարի 24-ին։ Դա հաստատել է ԵՄ խորհրդում նախագահող Բելգիայի արտգործնախարար Հաջա Լաբիբը։
«Մենք մտադիր ենք պատժամիջոցների 13-րդ փաթեթն ընդունել խորհրդանշական օրը՝ փետրվարի 24-ին», – նրա խոսքերն է մեջբերում ՏԱՍՍ-ը։
Հենց 2022 թ․ փետրվարի 24-ին է Ռուսաստանը ռազմական գործողություններ սկսել Ուկրաինայում։ Այս ընթացքում Եվրամիությունը Մոսկվայի դեմ ընդունել է պատժամիջոցների 12 փաթեթ, որոնք թիրախավորում են Ռուսաստանի ֆինանսական, տնտեսական, էներգետիկ ոլորտները։
Ավելի վաղ Reuters գործակալությունը, վկայակոչելով եվրոպական աղբյուրների, հաղորդել էր, որ պատժամիջոցների 13-րդ փաթեթը ներմուծման նոր սահմանափակումներ չի ենթադրում։ Ըստ գործակալության աղբյուրների՝ պատժամիջոցներ կսահմանվեն ֆիզիկական և իրավաբանական անձանց հանդեպ, որոնց ցանկում, սակայն, «խոշոր անուններ» չկան։
