«Գարդման-Շիրվան-Նախիջևան» համահայկական միությունը ողջունում է ԱՄՆ սենատորների բանաձևը
«Գարդման-Շիրվան-Նախիջևան» համահայկական միությունը հայտարարությամբ ողջունել է ԱՄՆ սենատորների բանաձևը՝ Ադրբեջանում մարդու իրավունքների իրավիճակի և ԱՄՆ աջակցության վերանայման վերաբերյալ։
Հայտարարության մեջ նշված է. «Հայտնի է դարձել, որ ԱՄՆ սենատորներ Էդ Մարքին և Բիլ Քեսիդին ներկայացրել են երկկուսակցական բանաձև՝ պահանջելով համապատասխան զեկույց Ադրբեջանում մարդու իրավունքների դրության վերաբերյալ։ Սպասվելիք զեկույցը կարող է հիմք հանդիսանալ Կոնգրեսի համար փոխելու կամ դադարեցնելու ԱՄՆ անվտանգության աջակցությունն Ադրբեջանին:
Բանաձևը պահանջում է պետքարտուղարին մանրամասն տեղեկություններ հաղորդել և՛ Ադրբեջանի ներսում մարդու իրավունքների խախտումների, և՛ Լեռնային Ղարաբաղում ռազմական գործողությունների ժամանակ և դրանց հետևանքով իրականացված էթնիկ զտումների վերաբերյալ։
Բանաձևին են միացել նաև այլ սենատորներ՝ Մարկո Ռուբիոն, Գարի Փիթերսը, Էլիզաբեթ Ուորենը, Շելդոն Ուայթհաուսը, Բոբ Մենենդեսը և Փիթեր Ուելչը։
«Գարդման-Շիրվան-Նախիջևան» համահայկական միությունը ողջունում է ԱՄՆ սենատորների նախաձեռնությունը։ Մենք միակարծիք ենք սենատոր Էդ Մարքինի այն ընդգծմանը, թե Ադրբեջանի կառավարությանը պատասխանատվության ենթարկելու անհրաժեշտությունը վաղուց արդեն հասունացել է։ Ավելին՝ միջազգային հանրությունն ուշացել է նախաձեռնողականության և հստակ ու վճռական քայլերի առումով։
Մենք բազմիցս արձանագրել ենք, որ Ադրբեջանի կատարած հանցանքներին անհամաչափ արձագանքն է տպավորություն ստեղծել Ադրբեջանի նախագահի մոտ, թե միջազգային իրավունքը միայն թույլ երկրների համար է, և որ Ադրբեջանն արդեն այնքան հզոր է, որ կարող է հրաժարվել միջազգային իրավունքի սկզբունքներից՝ մնալով անպատիժ։ Այս իրողության գործնական արտահայտությունն է դառնում հանցածին գործոնը՝ պատճառ դառնալով այնպիսի հանցանքների, ինչպիսին էթնիկ զտումն է կամ մշակութային ցեղասպանությունը։
Էդ Մարքին նաև նշել է, որ պետք է ճնշում գործադրել Ադրբեջանի վրա՝ դադարեցնելու էթնիկ հայերի դեմ հանցագործությունները, և պաշտպանել Լեռնային Ղարաբաղի ժողովրդի կամքը, իրավունքները և հիմնարար ազատությունները, ինչը միանշանակ ենթադրում է էթնիկ զտման ենթարկված հայության վերադարձի անօտարելի իրավունքի իրացում և դրա համար համապատասխան անվտանգային երաշխիքների ստեղծում։
«Գարդման-Շիրվան-Նախիջևան» համահայկական միությունը սատարում է ԱՄՆ սենատորներին և նաև հորդորում հետամուտ լինել հայության դեմ ադրբեջանական հանցանքների վերհանմանն ու համապատասխան պատժին, ինչպես նաև բարձրաձայնել 1988-1992 թթ․ պատմական Գարդմանի, Շիրվանի, Նախիջևանի տարածքից բռնագաղթեցված ավելի քան կես միլիոն հայության ոտնահարված իրավունքների ամբողջական և արդարացի վերականգնման խնդիրը»։
