Team-ի համահիմնադիրներ Եսայան եղբայրների վերաբերյալ քրեական վարույթ կա. նրանք երկրում չեն
Ըստ օդում կախված տեղեկությունների (ինչպես Նիկոլ Փաշինյանն է ասում)՝ «Team» ընկերությունների խմբի (խմբում ներառված են Team Telecom Armenia, Team Pay, Team Solutions, Team Systems, buy.am ընկերությունները) համահիմնադիրներ, բաժնետերեր Հայկ և Ալեքսանդր Եսայան եղբայրները լքել են Հայաստանը:
Եղբայրներից մեկն, ըստ 168.am-ին հասած տեղեկությունների, Հայաստանում չէ արդեն մի քանի ամիս, իսկ մյուսը երկրից դուրս է եկել շուրջ մեկ շաբաթ առաջ: Կրկին, ըստ օդում կախված տեղեկությունների, եղբայրների՝ Հայաստանը լքելու պատճառները երկուսն են՝ քաղաքական և ֆինանսական՝ կապված «Team» ընկերությունների խմբի փայաբաժինների վերաբաշխման հետ:
Մեր տեղեկություններով՝ եղբայրների նկատմամբ նաև քրեական վարույթ կա հարուցված:
168.am-ն այս հարցերի պատասխանները ստանալու համար երկու հարցում էր ուղարկել Ազգային անվտանգության ծառայություն (ԱԱԾ) և «Team» ընկերությունների խումբ:
ԱԱԾ-ից ցանկացել էինք տեղեկանալ՝ «Արդյո՞ք «Թիմ» ընկերությունների խմբի սեփականատերեր Հայկ և Ալեքսանդր Եսայանները գտնվում են հետախուզման մեջ: Եթե այո, ապա ո՞ր գործի շրջանակներում»:
Այսօր պաշտոնապես մեզ պատասխանել էին, որ հայցվող տեղեկատվությունը վերաբերում է տվյալ անձանց անձնական կյանքին և պարունակում է քրեական վարույթի՝ հրապարակման ոչ ենթակա տվյալներ, ուստի դրանք չեն կարող տրամադրվել:
Փաստորեն, ԱԱԾ-ն չի հերքել, որ Եսայան եղբայրների վերաբերյալ կա հարուցված քրեական վարույթ:
Նմանատիպ հարցում էլ ուղարկել ենք «Team» ընկերությունների խմբին: Դեռևս պատասխան չենք ստացել:
Թեմայի վերաբերյալ առաջիկայում հանդես կգանք նոր մանրամասներով:
