Եվրախորհրդարանը մշտական ներկայացուցիչներ կունենա Կիևում․ կողմերը հուշագիր են ստորագրել
Եվրախորհրդարանը (ԵԽ) և Գերագույն ռադան ստորագրել են փոխըմբռնման հուշագիր, որը, մասնավորապես, թույլ կտա կազմակերպել ԵԽ ներկայացուցիչների մշտական ներկայությունը Կիևում։ Այդ մասին հայտնել է Եվրախորհրդարանի ղեկավար Ռոբերտա Մեցոլան Բրյուսելում փաստաթղթի ստորագրումից հետո Ուկրաինայի խորհրդարանի նախագահ Ռուսլան Ստեֆանչուկի հետ կայացած համատեղ մամուլի ասուլիսում։
«Մի քանի վայրկյան առաջ մենք ստորագրեցինք փոխըմբռնման նոր հուշագիր մեր խորհրդարանի կողմից ժողովրդավարական աջակցության համար: Սա կարևոր և խորհրդանշական քայլ է մեր հարաբերությունների ամրապնդման համար: Սա նաև գործնական ուղի է, որի միջոցով մենք կօգնենք Ուկրաինային պատրաստվել անդամակցությանը: Այս գործընկերությունը կուժեղացվի Կիևում մշտական ներկայություն ապահովելու մեր որոշմամբ», – Մեցոլայի խոսքերն է մեջբերում ՏԱՍՍ-ը։
Ռոբերտա Մեցոլայի խոսքով՝ Եվրախորհրդարանը լիովին հավանություն է տալիս Ուկրաինային օգնության շարունակմանը։ Այդ կապակցությամբ նա կոչ է արել ԵՄ երկրներին հնարավորինս արագ համաձայնեցնել 2024-2027 թվականների համար Կիևին 50 միլիարդ եվրոյի հատկացումը։ Բացի այդ, Եվրախորհրդարանի ղեկավարը հույս է հայտնել, որ ԵՄ պետությունների ղեկավարները դեկտեմբերին կայանալիք գագաթնաժողովում կկարողանան որոշում ընդունել ԵՄ-ին Ուկրաինայի անդամակցության վերաբերյալ բանակցություններ սկսելու շուրջ:
