Վերապրեցինք այն դրական հույզերը, որոնք պարուրել էին բոլորիս մեկ տարի առաջ. Տավուշի երգչախմբի երեխաները մասնակցել են STARMUS VI ֆիլմի դիտմանը
STARMUS VI ֆիլմի փակ դիտմանը ապահովվել էր նաև Տավուշի մանկապատանեկան երգչախմբի երեխաների ներկայությունը:
Երեխաներն անթաքույց հուզմունքով ու երջանկությամբ էին դիտում մեծ իրադարձության մասին պատմող ֆիլմը, որի մաս են կազմել նաև իրենք՝ մեկ տարի առաջ։
«Ես շատ էի ցանկանում, որ երեխաները տեսնեն, թե ինչ մեծ իրադարձության մաս են կազմել իրենք և ոգեշնչվեն հետագա նորանոր նվաճումների համար, գիտակցեն, որ հնարավոր է համատեղել երգարվեստը գիտության հետ»,- նշել է STARMUS փառատոնի համահիմնադիր, աստղաֆիզիկոս Գարիկ Իսրաելյանը։
Երեխաները շեշտել են, որ ամենատպավորիչ հատվածը գիտնականների՝ աստղերի և տիեզերքի մասին զրույցներն էին:
«Ֆիլմը շատ մարդակենտրոն էր, ու մենք լիովին վերապրեցինք այն դրական հույզերը, որոնք պարուրել էին բոլորիս մեկ տարի առաջ։ Իսկապես, մեծ պատասխանատվություն էր ելույթ ունենալ 7000 հանդիսատեսով դահլիճում: Ֆիլմը դիտելուց հետո երեխաները մոտ ապագայում նման մեծ լսարանի առջև կրկին ելույթ ունենալու ցանկություն հայտնեցին։ Իսկապես, STARMUS-ը լուրջ ու անմոռանալի փորձառություն էր երեխաների համար»,- նշել է Տավուշի մանկապատանեկան երգչախմբի խմբավար Մարիա Գալստյանը։
Նոյեմբերի 17-18-ին Մոսկվա կինոթատրոնի էկրաններին փակ ցուցադրությամբ ներկայացվել է 2022 թվականի սեպտեմբերին Հայաստանում անցկացված STARMUS VI միջազգային գիտական փառատոնի մասին պատմող ֆիլմը։ Ֆիլմը ամփոփում է այն բոլոր էմոցիաները, գույներն ու մասշտաբային միջոցառումները, որոնք անցկացվեցին ՀՀ բուհերում, Մարզահամերգային համալիրում, Ազատության հրապարակում, Գառնու տաճարի հարակից տարածքում և մի շարք մարզային կառույցներում՝ ՔՈԱՖ-ում (Դսեղ) և Գյումրու տեխնոլոգիական կենտրոնում, այլուր։
Ֆիլմի միջազգային ցուցադրություններ արդեն իսկ հաջողությամբ իրականացվել են աշխարհի մի շարք երկրներում:
Ֆիլմի պրոդյուսերներն են STARMUS փառատոնի հիմնադիրներ աստղաֆիզիկոս Գարիկ Իսրաելյանը (Garik Israelian, կիթառահար, աստղաֆիզիկոս Բրայան Մեյը (Brian May), ЕММY մրցանակակիր ռեժիսոր Թոդ Դուգլաս Միլլերը (Todd Douglas Miller):
Ֆիլմի այլ ցուցադրություններ հայաստանյան կինոթատրոններում կամ հեռուստաեթերով չեն նախատեսվում։
Հաջորդ՝ Starmus VII փառատոնն անցկացվելու է Սլովակիայի Բրատիսլավա քաղաքում 2024 թվականի մայիսի 12-17:
Հայաստանում STARMUS VI գիտության և արվեստի փառատոնը անցկացվեց «STARMUS VI. 50 տարի Մարսի վրա» խորագրով և 2022 թվականի սեպտեմբերին Հայաստանը հյուրընկալեց աշխարհահռչակ գիտնականների և արվեստագետների՝ երաժիշտների, արտիստների, ովքեր փառատոնի օրերին Երևանում և մարզերում հանդես եկան դասախոսություններով ու ելույթներով, 2 անցկացվեցին գիտության փառատոններ և Գիտության հզոր ճամբար Օպերայի հարակից հատվածում։ Փառատոնի ամենահիշարժան պահերից էր աշխարհահռչակ Queen խմբի կիթառահար, աստղաֆիզիկոս Բրայան Մեյի ելույթը Հայաստանում՝ Մարզահամերգային համալիրի բեմում և նրա ստեղծագործություններից Տավուշի թեմի մանկական երգչախմբի երեխաների կատարումները։ Գառնու տաճարի տարածքում անցկացվեց Աստղային գիշեր միջոցառումը աստղագիտակներով և համերգային ծրագրով, իսկ Երևանի կենտրոնում Գիտության ճամբարը հյուրընկալեց գիտությամբ ու արվեստով հետաքրքրված հազարավոր մասնակիցների։
