ԿԳՄՍ նախարարության աշխատակիցները Քոբայրավանք և Սանահին վանական համալիրների նորոգման աշխատանքների իրականացումը գնահատել են բավարար
ԿԳՄՍ նախարարության պատմության և մշակույթի հուշարձանների պահպանության վարչության աշխատակիցներն այցելել են ՀՀ Լոռու մարզ՝ Քոբայրավանք և Սանահին վանական համալիր:
ԿԳՄՍ նախարարությունից հայտնում են, որ աշխատակիցները տեղում ծանոթացել են նախարարության պատվերով իրականացվող Քոբայրավանքի սեղանատան և Սանահին վանական համալիրի Սբ. Ամենափրկիչ եկեղեցու տանիքածածկերի նորոգման և տարածքի մասնակի բարեկարգման աշխատանքների ընթացքին։
Քոբայրավանքի սեղանատան վերականգնման աշխատանքները, որոնք վերսկսվել էին նախորդ տարի, մոտենում են ավարտին։ Աշխատանքները նախատեսվում է ավարտել մինչև նոյեմբերի վերջ։ Քննարկվել են ջրահեռացման խնդիրները, տրվել են լուծումներ։
Նախարարության «Պատմամշակութային ժառանգության գիտահետազոտական կենտրոն» ՊՈԱԿ-ի ջանքերով վերականգնման ընթացքում պեղվել-մաքրվել է նաև սեղանատան հատակը, բացվել են թոնրի, հորի կամ ջրավազանի հետքեր։ Համապատասխան կահավորմամբ դրանց հասանելիությունը կսահմանափակվի, իսկ հատակը կնորոգվի արդեն հաջորդ տարի։
Նախարարությունից հայտնում են, որ Սանահին վանական համալիրի Սբ Ամենափրկիչ եկեղեցու տանիքածածկերի նորոգման աշխատանքները ևս մոտենում են ավարտին. տարածքը մասնակի բարեկարգվել է, կառուցվել է հենապատ։
Եկեղեցու պատերը լվացվել են տարիների ընթացքում առաջացած կրային և այլ հետքերից։ Մատնանշվել են փոքր թերություններ, որոնք պետք է շտկվեն մինչև աշխատանքների ավարտը։
Աշխատանքների իրականացումը գնահատվել է բավարար:
