Իրանի նախագահը 50 երկրների ղեկավարների կոչ է արել ճնշում գործադրել Իսրայելի վրա
Իրանի նախագահ Էբրահիմ Ռայիսին նամակ է հղել 50 երկրների ղեկավարների՝ Իսրայելի վրա ճնշում գործադրելու կոչով, որպեսզի վերջինս դադարեցնի իր հարձակումները Գազայի հատվածի վրա։ Այդ մասին հաղորդել է Tasnim գործակալությունը։
Ըստ գործակալության տվյալների՝ Ռայիսիի ուղերձը հասցեագրված է, այդ թվում՝ Ռուսաստանի և Չինաստանի նախագահներին, ինչպես նաև Հորդանանի, Ղազախստանի, Թուրքիայի, Քենիայի և Հարավաֆրիկյան Հանրապետության ղեկավարներին։
Ռայիսին նամակի հասցեատերերին միասնության և համակարգման կոչ է արել, որպեսզի արդյունքում Իսրայելին պարտադրվի հրադադար հայտարարել Գազայում:
Ըստ Գազան վերահսկող պաղեստինյան ՀԱՄԱՍ արմատական շարժման տվյալների՝ իսրայելական հարվածներից զոհերի թիվը հասել է 13 000-ի։ Նրանց թվում կա ավելի քան 5500 երեխա։ Շուրջ 30 000 մարդ վիրավոր է։
Իսկ իսրայելցի զոհված զինվորների և սպաների թիվն, ըստ Իսրայելի պաշտպանության բանակի, հասել է 380-ի։ Հոկտեմբերի 7-ին ՀԱՄԱՍ-ի հարձակման ժամանակ Իսրայելում զոհվել էր 1200 մարդ, շուրջ 240 մարդ գերեվարվել էր։
