Լեհաստանի և Ուկրաինայի սահմանին 2500 մեքենաներից բաղկացած հերթ է գոյացել
Լեհաստանի հետ սահմանին 2500 մեքենաներից բաղկացած հերթ է գոյացել։ Այդ մասին հայտնել է Ուկրաինայի պետական սահմանային ծառայության ներկայացուցիչ Անդրեյ Դեմչենկոն։
«Լեհաստանից Ուկրաինայի ուղղությամբ, ըստ լեհ գործընկերների տեղեկությունների, նոյեմբերի 11-ի առավոտվա դրությամբ մոտ 2500 մեքենա է սպասում սահմանը հատելու համար։ Սա բոլոր երեք ուղղություններով. իրականում դրանց կեսը գտնվում են Յագոդին անցակետի ուղղությամբ»,- ասել է Դեմչենկոն։
Ուկրաինայի համայնքների, տարածքների և ենթակառուցվածքների զարգացման նախարարության տվյալներով՝ նոյեմբերի 13-ին նախատեսվում է հանդիպում Լեհաստանի իշխանությունների ներկայացուցիչների և փոխադրողների հետ՝ անցակետերն ապաշրջափակելու համար։
Ավելի վաղ լեհ փոխադրողները սկսել են արգելափակել Ուկրաինայի հետ սահմանին գտնվող ավտոմոբիլային անցակետերը։ Նրանք պահանջում են վերականգնել նախկինում չեղարկված թույլտվությունների համակարգն ուկրաինական առևտրային փոխադրողների համար՝ բացառությամբ մարդասիրական օգնության և ուկրաինական զորքերի մատակարարումների։ Նրանք պահանջում են նաև 2022 թվականի փետրվարից հետո Ուկրաինայում ստեղծված ընկերությունների լիցենզիաների կասեցում, դրանց ստուգում և բեռնված հերթերի բաժանում։ Ուկրաինայի պետական սահմանային ծառայությունը նշել է, որ Լեհաստանի հետ սահմանի երեք անցակետերում բեռնատարների տեղաշարժը դժվարանում է լեհ փոխադրողների գործադուլի պատճառով։
