Հայաստանը պատրաստ է փոխադարձության սկզբունքով հասցեագրել «անկլավների» հարցը. Փաշինյան
Հայաստանը պատրաստ է փոխադարձության սկզբունքով հասցեագրել նաև անկլավների հարցը։ Այսօր Ստրասբուրգում Եվրախորհրդարանի լիագումար նիստում հայտարարեց Նիկոլ Փաշինյանը՝ հիշեցնելով, թե այդ մասին ինքը հրապարակայնորեն հայտարարել է նաև օրեր առաջ։
«Ինչպես նաև պատրաստ ենք մինչև տարեվերջ Ադրբեջանի հետ խաղաղության և հարաբերությունների կարգավորման պայմանագիր կնքել»,- շեշտեց Փաշինյանը։
Ըստ նրա` Ադրբեջանի նախագահի` Գրանադայի գագաթնաժողովին չգալն, այսպես ասած, գործերը չի հեշտացրել։ Սակայն այս տարվա ընթացքում Բրյուսելում եռակողմ հանդիպում անցկացնելու պայմանավորվածություն կա, և եթե Գրանադայում ևս մեկ անգամ արձանագրված սկզբունքները վերահաստատվեն, ապա մինչև տարեվերջ Հայաստանի և Ադրբեջանի միջև խաղաղության պայմանագրի ստորագրումը կդառնա խիստ իրատեսական։
«Մենք պետք է անսասան շարժվենք դեպի խաղաղություն։ Եվ ես ու Հայաստանի կառավարությունը, Հայաստանի խորհրդարանական մեծամասնությունն ունենք այդ քաղաքական կամքը»,- հայտարարեց Փաշինյանը։
Նրա խոսքով` Հայաստանի և Ադրբեջանի միջև հարաբերությունների կարգավորման հարցում կարևոր է նաև միջազգային հանրության, Եվրամիության, տարածաշրջանի երկրների աջակցությունը, մասնավորաբար` նրանք պետք է հետամուտ լինեն արձանագրված սկզբունքների պահպանմանը։
