Սոչիում մեկնարկել է Պուտին-Էրդողան հանդիպումը
Սեպտեմբերի 4-ին Ռուսաստանի Սոչի քաղաքում մեկնարկել է Էրդողան-Պուտին հանդիպումը։ Հանդիպման՝ մամուլի համար բաց հատվածում Էրդողանը նշել է, որ Թուրքիա-Ռուսաստան առևտրաշրջանառությունն այս պահին 62 մլրդ դոլար է և իրենց ուրախացնում է այն, որ գնում են դեպի 100 մլրդ-ին։ Նա հավատ է արտահայտել առ այն, որ երկու երկրների կենտրոնական բանկերի նախագահների այսօրվա հանդիպումը կարևոր է լինելու երկկողմ հարաբերություններում տեղական դրամական միավորին ուղղված քայլ կատարելու հարցում։ Այս մասին տեղեկացնում է ermenihaber.am-ը։
Թուրքիայի ղեկավարն ընդգծել է, որ այս պահին զարգացումները բավականին լավ շարունակվում են «Աքքույու» ԱԷԿ-ում։ Նա նշել է, որ մտածում է՝ քննարկելու են նաև Սինոպի ԱԷԿ-ի հետ կապված համատեղ քայլ անելուն ուղղված հարցը։ Էրդողանը շեշտել է, որ տուրիզմի ոլորտում ՌԴ-ն առաջին տեղում է Թուրքիայում։
Շեշտելով, որ բոլորն սպասում են հացահատիկային միջանցքի հետ կապված հանդիպման արդյունքին՝ Էրդողանը ասել է, որ հավատում է՝ հանդիպումից հետո իրենց հղած ուղերձը շատ կարևոր է լինելու աշխարհի, մասնավորապես աֆրիկյան քիչ զարգացած պետությունների համար։ Էրդողանը նշել է, որ անդրադառնալու են պաշտպանական արդյունաբերության ոլորտում իրենց կատարելիք քայլերին, ինչպես նաև էներգետիկ ոլորտին։
