Չի կարող իշխանությունը հանրաքվեն օգտագործել Արցախը հանձնելու համար. դա բացառում եմ. Ավետիք Չալաբյան
«ՀայաՔվեի» նախաձեռնող խումբն այսօր Կենտրոնական ընտրական հանձնաժողով ներկայացրեց դիմում` նախաձեռնելով օրենսդրական նախագծի ներկայացում Ազգային ժողովին։
ԿԸՀ-ի մոտ լրագրողների հետ զրույցում նախաձեռնության հիմնադիր-անդամ Ավետիք Չալաբյանը նշեց, որ ըստ օրենքի` 10-օրյա ժամկետում ԿԸՀ-ն պետք է որոշում կայացնի, իսկ ԿԸՀ–ի դրական պատասխանից հետո կմեկնարկի ստորագրահավաքի գործընթացը։
«ՀայաՔվեն» առաջարկում է քրեականացնել Հայաստանի Հանրապետության անունից Արցախն այլ պետության մաս ճանաչող ցանկացած գործողություն:
«Հանրաքվեի մասին օրենքը նախատեսում է՝ ստորագրահավաքը կարող է տեղի ունենալ համայնքապետարանների, թաղապետարանների, մարզպետարանների, նախկին գյուղապետարանների (որոնք այժմ վարչական ղեկավարների նստավայրեր են) և նոտարական գրասենյակների տարածքներում։ Ինչպես նաև՝ եթե ստրագրողներն ունեն անհատական էլեկտրոնային ստորագրություն, կարող են նաև այդկերպ մասնակցել»,- հավելեց Ավետիք Չալաբյանը՝ նկատելով, որ ԿԸՀ բացասական պատասխանի դեպքում կդիմեն վարչական դատարան:
Նա հավելեց, որ Արցախից բավականին դրական արձագանքներ են ստացել նախաձեռնության առիթով։
Ըստ օրենքի` ստորագրահավաքի համար 60-օրյա ժամկետ է նախատեսված, հույս ունեն, որ 10-20 օրում կհավաքեն ստորագրությունների անհրաժեշտ քանակը։ Դրանից հետո կդիմեն ԿԸՀ, որտեղ կհաստատվի ստորագրությունների վավերականությունը, հետո կդիմեն արդեն Ազգային ժողով։
Նախաձեռնության անդամների ներկայացրած դիմումն ու ամբողջական փաթեթն ընդունեց ԿԸՀ քարտուղար Արմեն Սմբատյանը։
