Բայդենի և Յուն Սոկ Յոլի հանդիպման ժամանակ Սեուլի կողմից Կիևին զենք մատակարարելու հարցը չի քննարկվի
Սեուլի կողմից Կիևին ռազմական օգնություն տրամադրելու հարցն ընդգրկված չէ Հարավային Կորեայի և Միացյալ Նահանգների նախագահներ Յուն Սոկ Յոլի և Ջո Բայդենի հանդիպման օրակարգում: Այս մասին հաղորդում է Yonhap գործակալությունը՝ վկայակոչելով հանրապետության նախագահի վարչակազմի ներկայացուցչին։
«Ինչ վերաբերում է այն հարցին՝ արդյոք օրակարգում լինելու է սպառազինությամբ աջակցության հարց, ես կասեմ, որ այս պահին դա չի լինի», – լրագրողներին հայտնել է պաշտոնյան։
Այդուհանդերձ, նա նշել է, որ ԱՄՆ-ի և Հարավային Կորեայի ղեկավարները Ուկրաինայի իրավիճակը կքննարկեն գլոբալ խնդիրների համատեքստում։
Երկուշաբթի օրը ԱՄՆ-ի նախագահի ազգային անվտանգության հարցերով խորհրդական Ջեյք Սալիվանը լրագրողներին հայտնել էր, որ Ուկրաինան կարևոր թեմա կդառնա Բայդենի և Յուն Սոկ Յոլի բանակցություններում, սակայն ռազմական օգնության հարցի հետ կապված մանրամասներ չէր հաղորդել:
Յուն Սոկ Յոլն ապրիլի 24-ից մինչև 29-ը պետական այցով գտնվում է Միացյալ Նահանգներում։
Ավելի վաղ Reuters-ին տված հարցազրույցում Հարավային Կորեայի նախագահը հնարավոր էր համարել Ուկրաինային զինամթերքի և զրահատեխնիկայի մատակարարումը, եթե լուրջ սպառնալիք ծագի Ուկրաինայի խաղաղ բնակչության համար: Կրեմլում ափսոսանք են հայտնել այդ կապակցությամբ։ ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ Կիևին զենքի ցանկացած մատակարարում դիտվում է որպես հակառուսական գործողություն:
Իր հերթին ՌԴ նախագահի մամուլի քարտուղար Դմիտրի Պեսկովը հայտարարել է, որ սպառազինությունների մատակարարումների մեկնարկն «անուղղակիորեն կնշանակի հակամարտության մեջ ներգրավվածության որոշակի փուլ»։
