«Անիվ» հիմնադրամը և «Մատենա» միջազգային բիզնես դպրոցը հայտարարում են համագործակցության մասին
Հայագիտական հետազոտությունների զարգացման և աջակցության «Անիվ» հիմնադրամը սկսել է համագործակցությունը «Մատենա» միջազգային բիզնես դպրոցի հետ: Համագործակցության շրջանակում «Անիվ» հիմնադրամը կրթաթոշակներ կտրամադրի կրթության, գիտության և մշակույթի ոլորտի մասնագետներին: Այդպիսով, նշված ոլորտների մասնագետները կարող են մասնակցել «Մատենա»-ի ուսումնական ծրագրերին՝ վճարելով վարձի ընդամենը 7%-ը. 93%-ը կտրամադրի «Անիվ» հիմնադրամը՝ որպես կրթաթոշակ:
Կրթաթոշակների համար կարելի է դիմել մայիսին մեկնարկող «Թիմերի և մարդկանց առաջնորդում» և «Ռազմավարական պլանավորում և բիզնեսի զարգացում» ուսումնական ծրագրերին մասնակցելու համար: Կրթաթոշակի տրամադրման մասին որոշումը կկայացնի «Մատենա» բիզնես դպրոցի և «Անիվ» հիմնադրամի համատեղ հանձնաժողովը՝ հիմք ընդունելով դիմորդի մոտիվացիոն նամակը և բանավոր զրույցը:
«Կարևորելով առաջնորդների դերը համակարգերի զարգացման գործում, ինչպես նաև գնահատելով այդ նպատակին ուղղված մեր բարձրակարգ կրթական ծրագրերը, «Անիվ» հիմնադրամը պատրաստակամություն հայտնեց տրամադրել կրթաթոշակներ մեր լավագույն դիմորդներին: Շնորհակալություն ենք հայտնում հիմնադրամի ղեկավարությանը՝ մեզ վստահելու և Հայաստանում որակյալ կրթությունը հասանելի դարձնելու կարևորագույն առաքելությանը միանալու համար»,- նշեց «Մատենա» դպրոցի տնօրեն Ռուբեն Հայրապետյանը:
«Մենք հասկանում ենք, թե ժամանակակից աշխարհում որքան կարևոր է առաջատար գիտելիքների մատչելիությունը: Բարձր որակավորում ունեցող կադրերի նախապատրաստումը ցանկացած երկրի մրցունակության և զարգացման հիմքն է: Մեր ֆինանսական աջակցությունը նոր հնարավորություններ է բացում մասնագետների առաջ, ովքեր ձգտում են ստանալ որակյալ կրթություն և բացահայտել իրենց ներուժը»,- ասում է «Անիվ» հիմնադրամի հոգաբարձուների խորհրդի նախագահ Արտեմ Կոնստանդյանը։
«Մատենա» բիզնես դպրոցի ծրագրերը նախատեսված են միջին և բարձր օղակների ղեկավարների համար, ովքեր ձգտում են կատարելագործել իրենց մասնագիտական և առաջնորդային հմտությունները: Կրթության ձևաչափը հնարավորություն է տալիս՝ համագործակցելով համաշխարհային հեղինակավոր հաստատությունների հետ, համադրել տեղական և միջազգային փորձը, ներգրավել Հայաստանի և արտերկրի փորձագետներին:
Ծրագրերի փորձագետներն առաջատար մասնագետներ են, որոնք ունեն ղեկավար աշխատանքի և դասավանդման բազմամյա փորձ:
