Խուզարկություն Երևանի փոխքաղաքապետի աշխատասենյակում.  քաղաքապետարանից  հաստատում են, բայց մանրամասներ չեն հայտնում

Մարտի 10-ին, օրվա երկրորդ կեսին մամուլում լուր տարածվեց, որ  Հակակոռուպցիոն կոմիտեն խուզարկություն է իրականացնում Երևանի փոխքաղաքապետ Գևորգ Սիմոնյանի աշխատասենյակում:

168.am–ը  Երևանի քաղաքապետարանի լրատվական վարչությունից փորձեց ճշտել, թե արդյոք խուզարկության մասին մամուլի շրջանառած տեղեկությունը համապատասխանո՞ւմ է իրականությանը: Մեր հարցերին ի պատասխան՝ հաստատեցին,  որ խուզարկություն  կատարվում է, իսկ  թե ինչ նպատակով, փոխանցեցին, թե իրենք տեղեկություն չունեն:

Մեր հաջորդ հարցին, թե ինչ գործի շրջանակներում է խուզարկություն իրականացվում, պատասխանեցին. «Հատուկ ծառայությունների նախաձեռնած որևէ գործընթաց՝ Երևանի քաղաքապետարանի հետ կապված, չենք մեկնաբանում»:

Ի դեպ,  «Հրապարակ» օրաթերթի տարածած տեղեկություններով՝ Հակակոռուպցիոն կոմիտեն Երևանի փոխքաղաքապետ Գևորգ Սիմոնյանի աշխատասենյակում քննչական գործողություններ է իրականացնում առողջապահության համակարգի չարաշահումների հետ կապված քրեական գործի շրջանակներում։ Խոսքը  Հայաստանում քովիդի պանդեմիայի ժամանակահատվածում պետական միջոցների ծախսերին է վերաբերում։ Ստուգումներն իրականացրել էր Հաշվեքննիչ պալատը և  արդյունքներն ուղարկել դատախազություն, որտեղ էլ ընթացք է տրվել դրան։