Ինչո՞ւ Երևանում չեն գործում 65, 41, 67, 36 երթուղիները. Պարզաբանում քաղաքապետարանից
![](https://168.am/wp-content/uploads/2021/11/ertevekutyan_phophoxutyun_davt_n132420_1.thumb_.jpg)
Օրերս Երևանի մասնավորապես Չարբախ թաղամասում բնակվող քաղաքացիները սոցիալական ցանցերում դժգոհում են, որ 65 համարի միկրոավտոբուսները հանվել են երթուղուց, ու իրենք ստիպված մեծ մասամբ օգտվում են տաքսի ծառայություններից:
Նրանց փոխանցմամբ՝ չեն գործում նաև 41, 67, 36 երթուղիները:
Երևանի քաղաքապետարանի լրատվության վարչությունից 168.am-ին հայտնեցին, որ բոլոր այն երթուղիները, որոնք ընթացքում փակվել են, հատկապես սպիտակ «Գազել»-ները, 15 տարին լրացած է եղել: Ու, քանի որ տնտեսվարող սուբյեկտները, ցավոք, երթուղիները չեն ցանկացել համալրել սեփական միջոցներով, քաղաքապետարանը հընթացս պետք է նաև բոլոր այդ երթուղիները լրացնի, որոնց թվում՝ նաև նշված երթուղիներից մի քանիսը:
«41 երթուղու փոխարեն՝ 39-ի վերջնականգառն է երկարացվել Չարբախի կողմից, իսկ Մամիկոնյանց փողոց հասնում է 24 համարի երթուղին: Կոնկրետ նույն ուղեգծով 41-ի փոխարեն նոր երթուղի չի մտել: 65 համարի երթուղայինը Աերացիա (Երևանի թաղամաս) էր հասնում, դրա փոխարեն՝ Մոնումենտի կողմից 62 միկրոավտոբուսն է, որը նույնպես հասնում է Աերացիա: 15 և 12 համարի ավտոբուսները նույնպես սպասարկում են վերոնշյալ թաղամասը: 67 համարի երթուղայինների 15 տարին լրացած է եղել, շահագործումից հանվել են, բայց շուտով դրանց կփոխարինեն միկրոավտոբուսները: 36 համարի երթուղայինի դեպքում տնտեսվարող սուբյեկտն է հրաժարվել գծի սպասարկումից: 36-ին մասնակի փոխարինում է 22 համարի միկրովտոբուսային երթուղին, որը Սպանդարյան փողոցից հասնում է Բանգլադեշ»,- նշեցին տեղեկատվության և հասարակայնության հետ կապերի վարչությունից:
Հետաքրքրվեցինք, թե ե՞րբ են երթուղի դուրս գալու նոր ավտոբուսները, վարչությունից հայտնեցին, որ նոր ավտոբուսներընախատեսում են շահագործել մարտ ամսին: