Չեխիայում վերսկսվել է նախագահական ընտրությունների քվեարկությունը

Չեխիայում հունվարի 14-ին ժամը 8:00-ին վերսկսվել է հունվարի 13-ին մեկնարկած նախագահական ընտրությունների քվեարկությունը։

Այս մասին հայտնում է ՌԻԱ Նովոստին, վկայակոչելով Չեխական հեռուստատեսությանը:

Ըստ հեռուստատեսության տվյալների՝ որոշ ընտրատեղամասերում, տեղական ընտրական հանձնաժողովների տվյալներով, առաջին օրը քվեարկել է ընտրողների մոտ 50%-ը։ Հունվարի 14-ին քվեարկությունը կտևի մինչև ժամը 14:00-ն, որից հետո կսկսվի նախագահի թեկնածուների օգտին տրված ձայների հաշվարկը։

Չեխիայում բոլոր ընտրություններն ավանդաբար անցկացվում են երկու օրվա ընթացքում: Եթե ​​Հանրապետության նախագահի թեկնածուներից ոչ մեկն առաջին փուլում չհավաքի ձայների 50%-ից ավելին, ապա հունվարի 27-28-ին կկայանա քվեարկության երկրորդ փուլը, որում կընդգրկվեն առավելագույն ձայներ հավաքած երկու թեկնածուները: Երկրորդ փուլում հաղթելու համար նրանցից մեկին անհրաժեշտ կլինի հավաքել ձայների մեծամասնությունը։

Երկրի ղեկավարի պաշտոնում իրենց թեկնածությունն են առաջադրել 8 հոգի. Ֆավորիտներն են ՆԱՏՕ-ի ռազմական կոմիտեի նախկին ղեկավար, պահեստային բանակի գեներալ, 61-ամյա Պյոտր Պավելը, նախկին վարչապետ, դոլարային միլիարդատեր 68-ամյա Անդրեյ Բաբիշը։

Ըստ աղբյուրի՝ հունվարի 9-ին հրապարակված վերջին հարցման արդյունքները ցույց են տվել, որ Պյոտր Պավելը կարող է հավաքել ձայների 29,5%-ը, իսկ Բաբիշը՝ 26,5%-ը։ 44-ամյա տնտեսագետ Դանուշե Ներուդովան, ով նրանց հետ հավասար էր 2022 թվականի նոյեմբեր-դեկտեմբերի հարցումներում, այժմ նկատելիորեն զիջում է՝ ստանալով ձայների ընդամենը 21%-ը։