Մունդիալ-2022. Խորվաթիան հետխաղյա 11 մետրանոց հարվածաշարի շնորհիվ կիսաեզրափակիչում է
Ֆուտբոլի աշխարհի առաջնության քառորդ եզրափակիչի շրջանակներում միմյանց դեմ մրցեցին Խորվաթիան և Բրազիլիան:
Կատարի մայրաքաղաք Դոհայի «Educated» մարզադաշտում կայացած խաղի մեկնարկային րոպեների երկու թիմերն էլ «հետախուզական» ֆուտբոլ էին ցուցադրում՝ առավել զգուշավոր խաղալով: Խորվաթները ձգտում էին «առաջին համարով» գործել: Բրազիլիան էլ հակագրոհում էր և սուր պահեր ստեղծում:
Խաղակեսի միջնամասում բրազիլացիները տիրել էիր նախաձեռնությանը և խորվաթները հիմնականում գործում էին պաշտպանությունում: Առաջին կեսում այդպես էլ դարպասի գրավում չարձանագրվեց:
Երկրորդ կեսի մեկնարկում աշխարհի 5-ակի չեմպիոնները մի քանի լավ հնարավորություն ունեին բացելու հանդիպման հաշիվը, սակայն հաջող էր գործում Խորվաթիայի դարպասապահը:
Երկու թիմերն էլ հիմնականում դիրքային գրոհներ էին կազմակերպում, բայց վերջին հարվածը չէր կայանում: Հանդիպման հիմնական ժամանակի վերջնամասում Բրազիլիան անընդմեջ գրոհում էր, սակայն, ի վերջո, խաղը տեղափոխվեց լրացուցիչ ժամանակ:
Առաջին կեսի վերջում Նեյմարին հաջողվեց իրացնել իր պահը և առաջ մղել Բրազիլիայի ընտրանուն: Այս գոլով Նեյմարը հավասարվեց Պելեին՝ Բրազիլիայի ընտրանու կազմում խփած գոլերի թվով (77 գնդակ):
Լրացուցիչ երկրորդ կեսում խորվաթները կարողացան վերականգնել հաշվի հավասարությունը: Արագ հակագրոհով գոլի հեղինակ դարձավ Պետկովիչը:
Եվ, ի վերջո, որոշիչ դարձավ հետխաղյա 11 մետրանոց հարվածաշարը, որտեղ առավել դիպուկ էին խորվաթները:
Խորվաթիա-Բրազիլիա՝ 1:1 (4:2): Մունդիալի կիսաեզրափակիչում Խորվաթիան կմրցի Նիդերլանդներ-Արգենտինա խաղի հաղթողի հետ:
