Հայ-չեխական արշավախումբը Հայաստանում բեզուարյան այծի որսով զբաղվող որսակայան է հայտնաբերել
Հայ-չեխական համատեղ արշավախումբը Նորավանքի կիրճում` Գնիշիկաձորի պեղավայրում, հետաքրքիր բացահայտումներ է արել: «Արմենպրես»-ի հետ զրույցում արշավախմբի ղեկավար Բորիս Գասպարյանն ասաց, որ Գնիշիկաձորում արշավախումբը երկու հուշարձանում է պեղումներ իրականացրել:
«Այս տարի պեղել ենք Գնիշիկաձորի հնագիտական համալիրը և «Համար մեկ» անունով ժայռածածկը: Գնիշիկաձորում արդեն բացված հուշարձանից բավական ներքև, մեր չեխ կոլեգաները գեոռադարի միջոցով ինչ-որ պատի հետքեր էին ֆիքսել: Մեր նպատակն էր պարզել` այդ պատը կա՞ իրականում, թե՞ ոչ»,- ասաց Գասպարյանը՝ հավելելով, որ պատը նման է հին հնձանի, որտեղ պեղումների արդյունքում նաև հին շերտագրական միավորներ են ֆիքսվել, որի ուսումնասիրությունը բաժին կհասնի ապագա պեղումներին:
«Համար մեկ» ժայռածածկի պեղումներին անդրադառնալով` Բորիս Գասպարյանն ասաց, որ ուսումնասիրությունների ընթացքում նետասլաքներ, ոսկրային զանգվածներ են հայտնաբերվել:
«Ամբողջ տվյալների ժամանակագրությունը դեռ չունենք, բայց ամենայն հավանականությամբ դա շարունակական որսակայան է եղել և հիմնականում ուղղված է եղել բեզուարյան այծի որսին: Դատելով ոսկրային մնացորդներից, նետասլաքներից՝ մարդիկ այդ որսորդական կայանում զբաղվել են բեզուարյան այծի որսով»,-հավելեց հնագետը:
