Իրանն Ադրբեջանի հետ սահմանի մոտ զորավարժություններ է սկսել
Իրանի Իսլամական հեղափոխության պահապանների կորպուսի (ԻՀՊԿ) ցամաքային ուժերը զանգվածային զորավարժություններ են սկսել Իրանի հյուսիս-արևմուտքում գտնվող Արևելյան Ադրբեջան նահանգում, հայտնում է ԻՌՆԱ գործակալությունը։
Զորավարժությունները ամենամյա առաքելության մի մասն են, որն ուղղված է Իսլամական հեղափոխության պահապանների կորպուսի ցամաքային ուժերի մարտունակության բարձրացմանը:
ԻՀՊԿ ցամաքային ուժերի հրամանատար, բրիգադային գեներալ Մոհամմադ Փաքփուրն ասել է, որ զորավարժությունները պետք է խաղաղության, բարեկամության և անվտանգության ուղերձ հասցնեն հարևաններին:
Զորավարժությունների օրակարգում են պարաշյուտային վայրէջքներ, գիշերային գործողություններ, ուղղաթիռների մարտական գործողություններ, մարտական և մահապարտ անօդաչու թռչող սարքերի գործողություն, ինչպես նաև Արաքս գետի վրա կամրջի կառուցում, ճանապարհների վերահսկում, բարձունքների գրավում և ոչնչացում։
