Պեկինում կայացել է ՇՀԿ-ի բժշկական և դեղագործական համագործակցության համաժողովը
Պեկինում կայացավ Շանհայի համագործակցության կազմակերպության կողմից կազմակերպված բժշկական և դեղագործական համագործակցության զարգացմանն ուղղված համաժողովը:
Համաժողովը կազմակերպվել էր ՇՀԿ-ի բարիդրացիության, բարեկամության և համագործակցության կոմիտեի, ՇՀԿ քարտուղարության, ՉԺՀ-ում Ուզբեկստանի Հանրապետության դեսպանության և Չինաստանի դեղագործական նորարարության և հետազոտությունների ասոցիացիայի կողմից:
Համաժողովի մասնակիցներն ու կազմակերպիչները բազմաբնույթ քննարկումների ծավալեցին «Դեղագործական համագործակցության ամրապնդում հանուն հանրային առողջության» թեմայի շուրջ։
Դեղագործական համագործակցության ամրապնդման և մարդկության ապագայի համար համատեղ ջանքեր գործադրելու նպատակով համաժողովի կազմակերպիչները կոչ արեցին մեծ ուշադրություն դարձնել անդամ պետությունների, դիտորդ պետությունների և գործընկերների փոխգործակցությանը՝ կառավարությունների և ձեռնարկությունների մասնակցությամբ:
Շանհայի համագործակցության կազմակերպության գլխավոր քարտուղար Չժան Մինը շեշտեց, որ ՇՀԿ անդամ պետությունները շարունակաբար մեծ ուշադրություն են դարձնում բժշկական և դեղագործական ոլորտներում համագործակցության զարգացմանը:
«ՇՀԿ անդամ պետություններ այցերի ընթացքում համոզվել եմ, որ Չինաստանը բարիդրացիական հարաբերություններ ունի այդ երկրների հետ, ինչը հնարավորություն է տալիս սերտ համագործակցություն ծավալել դեղագործության ոլորտում»,-ասաց նա:
Համաժողովի կազմակերպիչները միակարծիք են, որ անհրաժեշտ է ստեղծել դեղագործության ոլորտում փոխգործակցության համատեղ հարթակ ՇՀԿ անդամ երկրների կարգավորող մարմինների մասնակցությամբ:
Համաժողովին մասնակցեց նաև ՉԺՀ-ում Հայաստանի Հանրապետության դեսպանատան երկրորդ քարտուղար Կարեն Գևորգյանը:
