Թուրքիան Ուկրաինայում երկարաժամկետ զինադադարի հույս ունի. Էրդողան
Թուրքիայի նախագահ Ռեջեփ Թայիփ Էրդողանը հանդիպում է ունեցել Թուրքիայում իշխող «Արդարություն և զարգացում» կուսակցության (AKP) խորհրդարանական խմբակցության հետ, և ելույթում նշել, որ Թուրքիան Ուկրաինայում երկարատև զինադադարի հույս ունի:
Այս մասին հայտնում է թուրքական «Անադոլու» լրատվական գործակալությունը:
Էրդողանը հերթական անգամ քննադատել է միջազգային կառույցների՝ շեշտելով, որ դրանք ի վիճակի չեն դիմակայել ներկայիս ճգնաժամերին ու պատերազմներին։
«Միջազգային կառույցների, այդ թվում՝ ՄԱԿ-ի Անվտանգության խորհրդի արձագանքը սահմանափակվում է հայտարարություններով։ Սա ամոթալի է»,- ասել է Էրդողանը:
Նրա խոսքով, միջազգային կառույցները, որոնց առաքելությունն է պաշտպանել համաշխարհային անվտանգությունն ու կայունությունը, անտարբեր են մնում առանձին ժողովուրդների ողբերգությունների նկատմամբ։
«Նրանք, ովքեր աղմուկ են բարձրացնում, հենց որ խոսքը գնում է իրենց շահերի մասին, անտեսում են ողբերգական իրադարձությունները, որոնք տեղի են ունենում տարածաշրջանում (խմբ. նկատի ունի Սիրիայում), որտեղ գտնվում է Թուրքիան արդեն 11 տարի»,- ասել է Էրդողանը։
Նա նշել է, որ ուկրաինական իրադարձությունները դարձել են «երկակի ստանդարտների» քաղաքականության հերթական դրսեւորումը։
«Թուրքիան մեծ ջանքեր է գործադրել, որպեսզի Ուկրաինայի և Ռուսաստանի Դաշնության միջև ճգնաժամը ողբերգության չվերածվի։ Միաժամանակ, պետությունների ամբողջականությանն ու ինքնիշխանությանը աջակցելու Անկարայի կուրսը մնում է անփոփոխ։ Թուրքիան ջանքեր է գործադրում Ուկրաինայում մարտերը դադարեցնելու համար: Թուրքիան Ուկրաինայում երկարաժամկետ զինադադարի հույս ունի: Անկարան հավասարակշռված քաղաքականություն է վարում՝ բաց թողնելով երկխոսության ուղիները Մոսկվայի և Կիևի համար», – ասել է Էրդողանը։
Էրդողանը ուշադրություն է հրավիրել այն փաստի վրա, որ Ուկրաինայում ռազմական գործողությունների ֆոնին, որոնք ենթադրում են մարդկային մեծ կորուստներ երկու կողմերի համար, փախստականների թիվը հասել է 2 միլիոն մարդու։
Թուրքիայի ղեկավարը զգուշացրել է, որ եթե արյունահեղությունը շարունակվի, 5-10 միլիոն մարդ կլքի Ուկրաինան։
Էրդողանը «չափազանց նշանակալից» է անվանել Թուրքիայի, Ռուսաստանի Դաշնության և Ուկրաինայի արտգործնախարարների եռակողմ հանդիպումը, որը նախատեսված է մարտի 10-ին Անթալիայում։
