Աֆղանստանի ԱԳ նախարարը գնահատել է Օսլոյում Արեւմուտքի երկրների հետ անցկացված բանակցությունները
Օսլոյում մի շարք արեւմտյան երկրների, ներառյալ ԱՄՆ-ի հետ Աֆղանստանի պատվիրակության բանակցություններն անցել են հաջողությամբ. հաջողվել է փոխըմբռնման հասնել առանձին հարցերի եւ Աֆղանստանի նկատմամբ սահմանված պատժամիջոցների մասնակի չեղարկման շուրջ:
Այդ մասին ՌԻԱ Նովոստիին տված հարցազրույցում հայտարարել էԱֆղանստանի ժամանակավոր կառավարությունում ԱԳ նախարար Ամիր Խան Մութաքին: Թալիբների պատվիրակությունը հունվարի 23-ից մինչեւ 25-ը այցելել էր Օսլո, որտեղ բանակցություններ են անցկացվել աֆղանցի քաղաքական գործիչների, քաղաքացիական ակտիվիստների, ինչպես նաեւ Նորվեգիայից ու մի շարք այլ երկրներից ժամանած դիվանագետների հետ:
«Օսլոյում մենք հանդիպումներ ենք ունեցել Մեծ Բրիտանիայի, Ֆրանսիայի, Գերմանիայի, Իտալիայի, Նորվեգիայի եւ ԱՄՆ-ի ներկայացուցիչների հետ: Իհարկե, նրանք կասկածներ են ունեցել, իսկ մենք՝ պահանջներ, բայց հանդիպումները հաջողությամբ են անցել… Հատկապես ԱՄՆ-ի հետ բանակցություններում մենք առաջընթացի ենք հասել պատժամիջոցների չեղարկման հարցում»,-ասել է Մութաքին: Քաղաքական գործչի խոսքով՝ տրվել են մի շարք լիցենզիաներ, որոնք նպաստելու են Աֆղանստան միջոցներ վերադառնալուն: «Եվ մենք սպասում ենք ավելիին: Իրադրության բարելավման համեմատ մյուս երկրները խոստացել են հումանիտար օգնություն ցուցաբերել, որն արդեն ընդլայնվում է»,-հայտարարել է Մութաքին:
