«Փաշինյանի հետ հանդիպումից հետո Սյունիքի սահմանների պաշտպանության հետ կապված մտահոգություններն ավելի խորացան». Գորիսի փոխքաղաքապետ
Նոյեմբերի 24-ին Նիկոլ Փաշինյանը հանդիպել էր Կապան, Մեղրի, Տեղ, Տաթև, Գորայք, Քաջարան, Սիսիան համայնքների ղեկավարներին և Գորիս համայնքի ղեկավարի տեղակալին։
Կառավարության տարածած պաշտոնական հաղորդագրության համաձայն, համայնքապետերի հետ հանդիպման ժամանակ Նիկոլ Փաշինյանը խոսել է մարզի վերաբերյալ մի շարք խնդիրներից՝ նշելով, թե մարզը Կառավարության ամենօրյա ուշադրության կենտրոնում է։ Նա կարևորել է պաշտոնական՝ առաջին աղբյուրից տեղեկատվություն տրամադրելու գործընթացի պատշաճ իրականացումը։
168.am-ը Գորիսի փոխքաղաքապետ Կարո Քոչարյանից հետաքրքրվեց, թե ի՞նչ են քննարկել Նիկոլ Փաշինյանի հետ, և կոնկրետ անվտանգային հարցերի վերաբերյալ ի՞նչ առաջարկներ է արել Փաշինյանը։
«Ես այդ խորհրդակցությանը գնացել ու մասնակցել եմ, որպեսզի թույլ չտամ Սյունիքում կատարվող իրադարձությունները ենթարկեն մանիպուլյացիայի։ Ես նաև ասել եմ, որ Առուշ Առուշանյանի ջոկատը պատրաստ է կանգնել բանակի կողքին և Սյունիքի պաշտպանության համար կռիվ տալ, ես սա նրան էլ եմ ասել ու հիմա էլ ասում եմ բոլորին։ Նիկոլ Փաշինյանի հետ հանդիպումից հետո Սյունիքի սահմանների պաշտպանության հետ կապված իմ մտահոգություններն ավելի խորացան, քանի որ այդ հարցի վերաբերյալ որևէ հստակ պատասխան չստացանք»,- նշեց Կարեն Քոչարյանը։
Հարցին՝ Սյունիքի ճակատագրի վերաբերյալ Նիկոլ Փաշինյանը որևէ հստակ բան ասե՞լ է, Կարեն Քոչարյանը պատասխանեց.
«Ես արդեն ասացի, որ Սյունիքի ու Սյունիքի սահմանների հետ կապված ես կոնկրետ ոչինչ չհասկացա, ավելի շուտ՝ մտահոգվեցի։ Եկեք փակագծեր չբացեմ, ինչ պետք էր՝ ես ասացի»։
Եղե՞լ են Նիկոլ Փաշինյանի կողմից հստակ հանձնարարականներ համայնքապետերին՝ հարցին էլ, Կարեն Քոչարյանը կրկին պատասխանեց, որ մտահգություններն ավելի են խորացել, այլ բան ասել չի կարող։
