Բերման են ենթարկվել 24-ամյա երիտասարդ, ապա նաև նրա 28-ամյա ընկերը
Նոյեմբերի 19-ին, ժամը 18.15-ին, ոստիկանության Գյումրի քաղաքի Մուշի բաժին հաղորդում տվեց մի կին: Նա հայտնեց, որ ցերեկվա ժամը չորսից հինգը 81-ամյա մայրը բացակայել է տնից, իսկ վերադառնալով՝ տեսել է, որ մուտքի դռան ապակին կոտրված է: Տնից գողացել էին փող ու իրեր:
Բաժնի օպերատիվ խումբը մեկնեց դեպքի վայր, ձեռնարկեց անհրաժեշտ միջոցառումներ: Քրեական հետախույզներին հաջողվեց արագ ստանալ օպերատիվ տվյալներ, որոնք իրացվեցին նույն օրը: Ահազանգից երկու ժամ անց, գողությունը կատարելու կասկածանքով, բաժին բերման ենթարկվեց 24-ամյա երիտասարդ, ապա նաև նրա 28-ամյա ընկերը:
Ըստ օպերատիվ տեղեկության` հենց ընկերն էլ մտել էր թոշակառու կնոջ տուն: Երիտասարդը հրաժարվել է ցուցմունք տալուց, բայց նրա անձնական խուզարկությամբ հայտնաբերվել են իրեր, որոնք, նախնական տեղեկությամբ, հանցագործության գործիքն են:
Գողոնը մասամբ հայտնաբերվել և առգրավվել է: Երկուսն էլ ձերբակալվել և տեղափոխվել են ձերբակալվածների պահման վայր:
Շիրակի մարզային քննչական վարչությունում հարուցվել է քրեական գործ:
