Պեսկովը՝ Հայաստան-Ռուսաստան-Ադրբեջան ղեկավարների մակարդակով եռակողմ գագաթաժողովի անհրաժեշտության մասին
ՌԴ նախագահի խոսնակ Դմիտրի Պեսկովն անդրադարձել է հայ-ադրբեջանական սահմանին բռնկված լարված իրավիճակին: Լրագրողների հետ զրույցում Պեսկովը մասնավորապես նշել է, որ Հայաստանի և Ադրբեջանի սահմանին մարտերի վերսկսումը լուրջ անհանգստության առիթ է դարձել Կրեմլում, սակայն Մոսկվայի միջնորդությունը թույլ է տվել դադարեցնել դրանք:
Նրա խոսքով, Ռուսաստանը կշարունակի միջնորդությունը, սակայն իրադրության կայունացման հնարավոր է հասնել միայն Ղարաբաղի վերաբերյալ ընդհանուր պայմանավորվածությունները կատարելու ճանապարհով:
Նա նաև նշել է, որ Ռուսաստանի, Հայաստանի և Ադրբեջանի ղեկավարների մասնակցությամբ եռակողմ գագաթաժողովն ինչ-որ փուլում անհրաժեշտ կլինի։
«Անկասկած, ինչ-որ փուլում նման շփումներն անհրաժեշտ կլինեն, բայց որպեսզի դրանք հնարավոր լինեն, դրա համար պետք է երեք կողմերի համաձայնությունը»,- նշել է նա:
