«Արյան պաշարների հետ կապված մենք խնդիրներ չունենք, դրանք համալրված են, պարբերաբար համալրվում են». Անահիտ Ավանեսյան
Առողջապահության նախարար Անահիտ Ավանեսյանն այսօր խորհրդարանում լրագրողների հետ զրույցում ասաց, որ ամբողջ հանրապետությունում արյան պաշարները հաշվառվում են, և կա արյան բավարար պաշար բոլոր դեպքերի համար: Սակայն ժամանակ առ ժամանակ նաև լինում են հայտարարություններ, որպեսզի քաղաքացիները հանդես գան դոնորությամբ:
«Յոլյանի անվան արյունաբանական կենտրոնը մշտապես նման հայտարարություններ անում է: Կորոնավիրուսի թվի աճի հետ կապված՝ մենք վերջին շրջանում դոնորության նվազում ունենք, ինչը նաև իրենց կողմից ևս մեկ նախազգուշացում է, որ այն քաղաքացիները, որոնք համապատասխանում են այդ չափանիշներին, խնդրում են մոտենալ և հանդես գալ դոնորությամբ: Սակայն արյան պաշարների հետ կապված մենք խնդիրներ չունենք, դրանք համալրված են, պարբերաբար համալրվում են և ընթացիկ բնույթ են կրում»,- նշեց Անահիտ Ավանեսյանը՝ անդրադառնալով երեկ Յոլյանի անվան արյունաբանական կենտրոնի հայտարարությանը՝ արյան դոնորությամբ հանդես գալու վերաբերյալ:
Ինչ վերաբերում է երեկ Սյունիքում թշնամու ռազմական ագրեսիայի հետևանքով հայկական կողմի զոհերին, Անահիտ Ավանեսյանը զոհերի թվի վերաբերյալ տեղեկատվություն չհայտնեց` նշելով, որ պետք է հետևել Պաշտպանության նախարարության հաղորդվող տեղեկատվությանը, ավելին չի կարող ասել:
Լրագրողները Առողջապահության նախարարից նաև հետաքրքրվեցին՝ հայկական կողմը քանի՞ ծանր վիրավոր ունի, ինչի ի պատասխան՝ Անահիտ Ավանեսյանը կրկին հորդորեց հետևել Պաշտպանության նախարարության պաշտոնական հաղորդագրություններին:
Ինչ վերաբերում է ստեղծված իրավիճակում շտապօգնության ծառայությանը, Անահիտ Ավանեսյանը տեղեկացրեց, որ Երևանում և մարզերում շտապօգնության ծառայությունը մշտապես գտնվում է մոբիլիզացված վիճակում:
«Երեկ իմ տեղակալը եղել է Սյունիքում, Վայոց ձորում, տեղում իրականացնում ենք կարիքների գնահատում և օպերատիվ կերպով դրանց արձագանքում ենք: Երեկ մեր թիմը եղել է Բարձրավանում, Ճակատենում և այլ համայնքներում, այդ համայնքները կապահովվեն առաջին օգնության բոլոր պարագաներով: Կապանի, Գորիսի բժշկական կենտրոնները կունենան հավելյալ բժշկական ամենագնացներ»,- շեշտեց նա:
