Թշնամին արհամարհելով մարդու իրավունքների հիմնարար սկզբունքները՝ շարունակում է Հայաստանի նկատմամբ ոճրային արարքները․ Արամ Ա
Մեծի Տանն Կիլիկիո կաթողիկոս Արամ Առաջինը հանդես է հայտարարությամբ՝ անդրադառնալով Ադրբեջանի ռազմական ագրեսիայի հետևանքով ստեղծված սահմանային իրավիճակին:
Արամ Առաջինը Ֆեյսբուքի իր պաշտոնական էջում գրել է, որ ներկա կացության մեջ, երբ թշնամին, արհամարհելով միջազգային իրավունքի նորմերը, շարունակում է իր հանցավոր գործողությունները Հայաստանի նկատմամբ, հայ ժողովուրդը պետք է ամուր միասնականություն, աննկուն կամք և անզիջող կեցվածք ցուցաբերի:
«Արցախյան 44-օրյա պատերազմից հազիվ մեկ տարի անցած՝ նույն թշնամին, աշխարհի դիմաց, արհամարհելով մարդկային իրավունքի հիմնական սկզբունքները և ոտնակոխելով միջազգային օրենքները, շարունակում է իր ոճրային արարքները Հայաստանի նկատմամբ:
Հստակ են թշնամու հետապնդած նպատակները: Հայաստանի դաշնակիցների և բարեկամ նկատվող երկրների լռությունը տարօրինակ է: Այս կացության դիմաց մեր ժողովուրդը՝ Հայաստանում, Արցախում և Սփյուռքում, պետք է ցուցաբերի ամուր միասնականություն, աննկուն կամք և անզիջող կեցվածք», – գրել է Մեծի Տանն Կիլիկիո կաթողիկոսը:
