Կառավարության մոտից 16 անձ է բերման ենթարկվել բողոքի ակցիա իրականացնելու պատճառով
Կառավարության մոտից Ոստիկանությունը 16 անձի բերման է ենթարկել՝ «Վարչական իրավախախտումների վերաբերյալ» օրենսգրքի 182-րդ հոդվածի հիմքով (ոստիկանության ծառայողի օրինական պահանջը չկատարելը): Այս մասին հայտնում են ՀՀ ոստիկանության հասարակայնության հետ կապի և լրատվության վարչությունից:
Հիշեցնենք, որ ՀՀ ԱԽ քարտուղար Արմեն Գրիգորյանը Հանրային հեռուստաընկերության եթերում երեկ հայտարարել էր, որ Ադրբեջանը գիշերը 24:00-ից սկսած Գորիս-Կապան ճանապարհին կտեղադրի սահմանային և մաքսային հսկողության կետեր:
ԱԽՔ-ը նաև հայտնել էր, որ հայկական կողմը ևս համապատասխան քայլեր կձեռնարկի։
«Այսինքն՝ ճանապարհի այդ հատվածում ևս կտեղադրի մաքսային և սահմանային հսկողության գործառույթներ իրականացնող կետեր, և այդ աշխատանքները մենք նախապես արդեն սկսել ենք, որպեսզի այդ ուղղությամբ աշխատենք, բայց քանի որ, ինչպես հայտարարվել է արդեն, պատրաստ է Կապան-Տաթև ճանապարհը, այնտեղից էլ կամ Գորիս, կամ Երևան, կարելի է ասել, անվտանգ շահագործվող ճանապարհ ունենք, այլընտրանքային ճանապարհն այլևս պատրաստ է՝ ինչպես ապրանքներ տեղափոխելու, այնպես էլ՝ այլ տեսակի ցանկացած ավտոմեքենայի համար ճանապարհն օգտագործելի է։ Շատ կարևոր է, որ նոր կառուցված ճանապարհ է»,- ասել էր Գրիգորյանը։
Այս հայտարարությունից հետո այսօր Գեղամ Մանուկյանի կոչով քաղաքացիները հավաքվել էին ՀՀ կառավարության դիմաց և իրենց բողոքի ձայնն էին բարձրացնում կատարվածի վերաբերյալ, ինչը, սակայն, ոստիկանների անհամաչափ գործողություններին արժանացավ։ Նրանք բռնի ուժ գործադրելով բերման էին ենթարկում քաղաքացիներին։
