Բնակարանային գողություն` Ձորաղբյուրում
Հոկտեմբերի 28-ին ոստիկանության Կոտայքի բաժին հաղորդում էր ստացվել, որ Ձորաղբյուր գյուղի մի ամառանոցից գողություն են արել: Ահազանգը տարածքային կարգով փոխանցվեց ոստիկանության Գառնիի բաժանմունք: Օպերատիվ խումբը մեկնեց Ձորաղբյուր: Դեպքի վայրի զննությամբ իրավապահները պարզեցին, որ հոկտեմբերի 20-ից 28-ն ընկած ժամանակահատվածում կոտրել էին ամառանոցի պատուհանն ու դուռը և տունը տակնուվրա անելուց հետո գողացել հագուստ:
Դեպքի առթիվ Աբովյանի քննչական բաժնում հարուցվեց քրեական գործ:
Գողությունը կատարած անձի ինքնությունը պարզելու, նրան և գողոնը հայտնաբերելու ուղղությամբ հետախուզական միջոցառումներ սկսվեցին:
Ձեռնարկված միջոցառումների արդյունքում քրեական հետախույզները հաղորդումից երեք օր անց տեղեկություններ ստացան, որ գողությունը հնարավոր է կատարած լինի Երևանի Երիտասարդության փողոցի 23-ամյա մի բնակիչ:
Նոյեմբերի 1-ին կասկածվողը մայրաքաղաքից բերման ենթարկվեց ոստիկանության Կոտայքի բաժին: Նա տվել է խոստովանական բացատրություն և ներկայացվել նախաքննական մարմնին:
Հարուցված քրեական գործի նախաքննությունը շարունակվում է:
