Ո՞ւմ կընտրի իշխանությունը Վճռաբեկ դատարանի քաղաքացիական և վարչական պալատի դատավորի պաշտոնում
Ազգային ժողովի առաջիկա քառօրյայի ընթացքում պատգամավորները կընտրեն Վճռաբեկ դատարանի դատավորի: Թեկնածուները 3-ն են՝ Հովսեփ Բեդևյան, Հրաչ Այվազյան և Լիանա Հակոբյան:
Այս մասին հայտարարություն դեռևս 2021թ. մայիսին 25-ին է եղել՝ դեռևս Արարատ Միրզոյանի նախագահության օրոք:
«Հայաստանի Հանրապետության Սահմանադրության 166-րդ հոդվածի 3-րդ մասի և «Ազգային ժողովի կանոնակարգ» սահմանադրական օրենքի 143-րդ հոդվածի 2-րդ մասի համաձայն` Բարձրագույն դատական խորհուրդը Վճռաբեկ դատարանի քաղաքացիական և վարչական պալատի դատավորի թափուր տեղի համար առաջադրել է Հովսեփ Բեդևյանի, Հրաչ Այվազյանի և Լիանա Հակոբյանի թեկնածությունները»,- գրված է հայտարարության մեջ:
Հասկանալու համար, թե ով, ի վերջո, կընտրվի այդ տեղի համար, բավական է ծանոթանալ նրանց գործունեությանը հատկապես վերջին 3 տարիներին:
Հովսեփ Բեդևյանը մեկն էր նրանցից, ով 2020թ. նոյեմբերի 30-ին՝ պատերազմի խայտառակ ավարտից ու կապիտուլյացիայից կարճ ժամանակ անց, կառավարություն գնաց՝ Նիկոլ Փաշինյանի հետ հանդիպելու:
168.am-ի տեսախցիկը ֆիքսել էր վերջինիս՝ կառավարության շենք մտնելու կադրերը:
Հրաչ Այվազյանը 2013թ.-ից առ այսօր դատավոր է ՀՀ Վարչական դատարանում:
Հրաչ Այվազյանն է եղել այն դատավորը, ով հայցի ապահովման միջոց է կիրառել «Yerevan Today» կայքի լրագրող Սյուզի Բադոյանին առնչող գործով, որով և կասեցրել է ԱԺ ղեկավարության՝ լրագրողին ԱԺ հավատարմագրումից զրկելու ապօրինի որոշման գործողությունը:
Երրորդ թեկնածուն՝ Լիանա Հակոբյանը, նույնպես դատավոր է, կրկին՝ Վարչական դատարանում:
Վերջինս էլ «աչքի է ընկել» նրանով, որ վերացրել է ՀՀ 2-րդ նախագահ Ռոբերտ Քոչարյանի ինքնակենսագրական «Կյանք և ազատություն» գրքի գովազդի արգելքը:
Հայաստանյան դատաիրավական համակարգի իրողություններից քիչ թե շատ տեղյակ ցանկացած մեկն ինքը կարող է գլխի ընկնել, թե, ի վերջո, ո՞վ է Վճռաբեկ դատարանի՝ քաղաքացիական և վարչական պալատի դատավորի թափուր տեղի հավանական հավակնորդը:
