Թուրք խորհրդարանականները պատրաստվում են այցելել Շուշի. Ալիևն ընդունել է Թուրքիայի մեջլիսի նախագահին
Ադրբեջանի նախագահ Իլհամ Ալիևն այսօր ընդունել է Թուրքիայի Ազգային մեծ ժողովի (Մեջլիսի) նախագահ Մուսթաֆա Շենտոպին։ Այս մասին, ըստ «Փաստինֆոյի», հայտնում են ադրբեջանական կայքերը՝ հղում անելով նախագահական կայքին:
Հանդիպման ընթացքում կողմերը նշել են, որ երկու երկրները հաջողությամբ համագործակցում են բոլոր ոլորտներում: Ալիևն ու Շենտոպը քննարկել են Ադրբեջանի, Թուրքիայի և Պակիստանի խորհրդարանների խոսնակների առաջիկա հանդիպումը, որը նախատեսված է անցկացնել Բաքվում։
«Նշվել է նաև, որ երեք երկրների համագործակցությունը լայն իմաստով նոր շրջանակ է ձևավորել Եվրասիայում»,- ասված է հայտարարությունում։
Բացի այդ, կողմերը փաստել են, որ միջխորհրդարանական համագործակցությունը հաջողությամբ է զարգանում։
Հանդիպմանը Շենտոպն ասել է, որ ամբողջ թուրքական պատվիրակությունը ծրագրում է այցելել ադրբեջանի կողմից օկուպացված հայկական Շուշի:
