«Ինֆա» թայֆունը կաթվածահար է արել Շանհայի երթևեկությունը, 360 հազար մարդ տարհանվել է
«Ինֆա» թայֆունը կիրակի կեսօրին հասել է Չինաստանի հարավ-արևելյան Չժեցզյան նահանգի ափերին: Օդերևութաբանների տվյալներով՝ թայֆունը հյուսիս-արևմուտք է շարժվում ժամում 10 կիլոմետր արագությամբ և կիրակի երեկոյան կհասնի Շանհայ, հաղորդում է ria.ru-ն։
Քաղաքի իշխանությունները նախազգուշացման նախավերջին «նարնջագույն» մակարդակ են հայտարարել։
Տեղական ԶԼՄ-ների տվյալներով՝ Շանհայը արդեն ցիկլոնի ազդեցության տակ է․ քաղաքում քամու պոռթկումները հասնում են յոթ միավորի, փլվել են շուրջ հազար ծառեր, պոկվել են գովազդային վահանակներ և կոտրվել շենքերի ապակիներ:
Իշխանություններն արդեն ափամերձ շրջաններից տարհանել են շուրջ 360 հազար մարդկանց։ Այս պահին տուժածներ չկան:
Քաղաքի երկու միջազգային օդանավակայաններում չեղյալ են հայտարարվել բոլոր ուղևորատար չվերթները, փակվել է մետրոն, ինչպես նաև ամբողջությամբ դադարեցվել է արագընթաց գնացքների երթեևեկությունը։
