Ռուս խաղաղապահները Լեռնային Ղարաբաղում չպայթած զինամթերքից մաքրել են 5 հա գյուղատնտեսական նշանակության դաշտեր. ՌԴ ՊՆ
Ռուսական խաղաղապահ զորակազմի հումանիտար ականազերծման ինժեներա-սակրավորական ստորաբաժանման մասնագետները չպայթած զինամթերքի որոնման և մաքրման աշխատանքներ են իրականացրել Լեռնային Ղարաբաղի Մարտունու շրջանում: Այս մասին հայտնում է ՌԴ ՊՆ-ն:
Ինչպես նշվում է, չպայթած զինամթերքից մաքրվել է Մարտունու շրջանի Հերհեր բնակավայրը` շփման գծի մոտակայքում:
Աշխատանքներ են իրականացվել ավելի քան 5 հա գյուղատնտեսական նշանակության դաշտերում, հայտնաբերվել և վնասազերծվել է մոտ 30 տարատեսակ զինամթերք, այդ թվում` հրետանային արկեր և ականներ, հակատանկային նռնակներ, «Ուրագան» տեսակի համազարկային կրակի ռեակտիվ համակարգերի զինամթերք:
Բոլոր հայտնաբերված պայթյունավտանգ առարկաները դուրս են բերվում հատուկ սարքավորված զորավարժարան և վնասազերծվում են:
2020 թվականի նոյեմբերի 23-ից ի վեր չպայթած զինամթերքից մաքրվել է 2195,5 հա տարածք, 657,3 կմ ճանապարհ, 1897 շինություն: Հայտնաբերվել և վնասազերծվել է 25 677 պայթյունավտանգ առարկա:
