Արցախի պետական նախարարն այցելել է ֆիզիկամաթեմատիկական հատուկ դպրոցի Ստեփանակերտի մասնաճյուղ
Արցախի Հանրապետության պետական նախարար Արտակ Բեգլարյանը հուլիսի 16-ին այցելել է Երևանի պետական համալսարանին առընթեր Արտաշես Շահինյանի անվան ֆիզիկամաթեմատիկական հատուկ դպրոցի Ստեփանակերտի մասնաճյուղ:
ԱՀ պետական նախարարի աշխատակազմի տեղեկատվության և հասարակայնության հետ կապերի բաժնից,պետական նախարարին են ներկայացվել դպրոցի շենքային պայմանների բարելավման, ուսումնական պարագաներով և լաբորատոր սարքավորումներով հագեցման, անհրաժեշտ մասնագետների ներգրավման հարցերը:
«Շենքային պայմանների բարելավման հարցն ուսումնասիրվելու է մասնագետների կողմից և սեղմ ժամկետում առաջարկ է ներկայացվելու կառավարությանը: Ինչ վերաբերում է Արցախում կրթական մակարդակը որակապես նոր շունչ հաղորդելուն, ապա մեր հիմնական նպատակներից մեկն է հանրակրթական և բարձրագույն կրթության ոլորտում բնագիտական ուղղության զարգացումն ու մրցունակ գիտելիքներով զինված մասնագետներ ունենալը: Այդ հարցում բարձր եմ գնահատում ԵՊՀ-ին առընթեր ֆիզիկամաթեմատիկական հատուկ դպրոցի Ստեփանակերտի մասնաճյուղի դերակատարումը, և, ըստ այդմ, քայլեր կձեռնարկվեն հաստատությունն անհրաժեշտ մասնագետներով համալրելու և սարքավորումներով վերազինելու ուղղությամբ»,- նշել է Արտակ Բեգլարյանը:
Պետական նախարարի աշխատանքային այցին միացել էին ԱԺ փոխնախագահ Գագիկ Բաղունցը, ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի անդամ Էլեոնորա Ավանեսյանը, կրթության, գիտության, մշակույթի և սպորտի նախարար Լուսինե Ղարախանյանը, քաղաքաշինության նախարարի տեղակալ Ազատ Համբարձումյանը:
