Նիկոլ Փաշինյանի, Ռոբերտ Քոչարյանի, Սերժ Սարգսյանի ելույթները չեն կարող համարվել բռնություն հրահրող. Կարեն Բիշարյան
![](https://168.am/wp-content/uploads/2021/07/SD-1.jpg)
Դատախազության ներկայացուցիչ Կարեն Բիշարյանը՝ Սահմանադրական դատարանում արտահերթ ընտրությունների վիճարկման դիմումներով որպես հարակից պատասխանող կողմ, բարձր դատարանում անդրադարձավ նախընտրական քարոզչության ընթացքում թեկնածուների ելույթներում, հոլովակներում ատելության խոսքի և բռնության հրապարակային կոչերի օգտագործման հարցին:
«Նախընտրական քարոզչության ընթացքում բռնության տարրեր պարունակող խոսքի առավել առերևույթ ցայտուն դեպքերը քրեադատավարական ընթացակարգերով ստուգվել են և կայացվել են քրեական գործ հարուցելը մերժելու մասին որոշումներ… Դատախազությունը գտնում է, որ կախված խոսքի համատեքստից, խոսքը արտահայտողի անձից, դիտավորությունից, խոսքի բովանդակությունից և ձևից, սրությունից և վնասի հնարավորությունից, այդ չափանիշներով պետք է գնահատել բռնության կոչի և բռնության սպառնալիքի հանրային վտանգավորությունը, և քրեական հետապնդման մարմինները ստացված հաղորդագրությունները հենց այս չափանիշներով էլ գնահատման են ենթարկել»,- ասաց Կարեն Բիշարյանը՝ անդրադառնալով հարցի քրեաիրավական կողմին:
Բիշարյանի խոսքով՝ Դատախազությունը գնահատական է տվել նախընտրական քարոզարշավի ընթացքում առերևույթ բռնության կոչեր հնչեցնելու և սպառնալիքներ տալու 4 դեպքի առնչությամբ, որոնցով քրեական գործ հարուցելու հիմքեր չեն հայտնաբերել: Բիշարյանը նաև տեղեկացրեց, որ որոշումներ կայացնելիս հաշվի են առել նաև միջազգային փաստաթղթերն ու ՄԻԵԴ որոշումները.
«Պետք է փաստել, որ նախընտրական քարոզչության ընթացքում թեկնածուների և մասնավորապես քաղաքական կուսակցությունների կամ դաշինքների առաջնորդներ Նիկոլ Փաշինյանի, Ռոբերտ Քոչարյանի, Սերժ Սարգսյանի և մյուսների ելույթները իրենց ամբողջության մեջ չեն կարող համարվել բռնություն հրահրող, բռնությունը հրապարակայնորեն արդարացնող կոչեր պարունակող: Այս դիրքորոշումը պայմանավորված էր այն փաստով, որ վերջիններս ելույթ են ունեցել՝ որպես քաղաքական կուսակցությունների կամ դաշինքի առաջնորդներ, և որպես իշխանական կամ ընդդիմադիր քաղաքական կուսակցության կամ դաշինքի ղեկավար՝ նախընտրական հանրահավաքների և հանդիպումների ընթացքում ներկայացրել են իրենց կուսակցության կամ դաշինքի հայացքներն ընդհանուր հետաքրքրություն ներկայացնող հանրային նշանակություն ունեցող քաղաքական հարցերի վերաբերյալ, և հետևաբար՝ գտնվել են ազատ խոսքի պաշտպանության ներքո»:
Դատախազության ներկայացուցչի խոսքով՝ նախընտրական քարոզարշավի մասնակիցների ելույթները, դրանցում օգտագործած արտահայտությունները քրեաիրավական տեսանկյունից գնահատվել են՝ որպես հանցակազմ չպարունակող արտահայտություններ:
Անդրադառնալով հայտնի մուրճին՝ Բիշարյանը նշեց, թե Փաշինյանի հնչեցրած բոլոր հայտարարություններում «կարմիր թելի նման անցել է հետևյալ գաղափարը, որ մուրճի ցուցադրումը դա սիմվոլ է, և այս ամենը հետապնդում է օրենքի դիկտատուրա հաստատելու նպատակ»: