ՀՀ սահմաններով թմրանյութի տեղափոխման կանխումը ՊԵԿ առաջնահերթություններից է. ՊԵԿ ներկայացուցիչ
Հայաստանի Հանրապետության իրավապահ մարմինները ձեռնարկում են հնարավոր բոլոր միջոցները՝ Հայաստանի սահմաններով թմրանյութերի ապօրինի հոսքը կանխելու ուղղությամբ:
Այս մասին վստահեցրել է ՊԵԿ մաքսանենգության դեմ պայքարի վարչության իրավապահ համագործակցության և տեղեկությունների վերլուծության բաժնի պետ Արտաշես Ղամբարյանը՝ Թմրամիջոցների չարաշահման և ապօրինի շրջանառության դեմ պայքարի միջազգային օրվա առթիվ ՄԱԿ թմրամիջոցների և հանցավորության դեմ պայքարի գրասենյակի Միջին Ասիայի տարածաշրջանային գրասենյակի կազմակերպած առցանց ասուլիսին։
ՊԵԿ մաքսանենգության դեմ պայքարի վարչության իրավապահ համագործակցության և տեղեկությունների վերլուծության բաժնի պետն անդրադարձել է թմրամիջոցների տարածման համաշխարհային խնդրին և դրա դեմ պայքարին: Նա ընդգծել է, որ Հայաստանի Հանրապետության իրավապահ մարմինները ձեռնարկում են հնարավոր բոլոր միջոցները՝ Հայաստանի սահմաններով թմրանյութերի ապօրինի հոսքը կանխելու ուղղությամբ՝ որպես օրինակ ներկայացնելով ՊԵԿ մաքսանենգության դեմ պայքարի վարչության աշխատակիցների կողմից 351կգ քաշով հերոինի հայտնաբերումը 2021թ․-ին:
Առցանց ասուլիսին ներկայացվել է նաև ՄԱԿ-ի՝ 2021 թվականի Թմրամիջոցների տարեկան զեկույցը, որում ամփոփված է այս բնագավառում աշխարհում տիրող իրավիճակի վերաբերյալ ամբողջական տեղեկատվություն:
