Հայաստանում շատ անկարևոր մարդիկ կան. Տիգրան Ուլիխանյան
ԱԺ «Իմ քայլը» խմբակցության պատգամավոր Տիգրան Ուլիխանյանն այսօր խորհրդարանում լրագրողների հետ ճեպազրույցում հայտարարեց, թե կորոնավիրուսով պայմանավորված իրավիճակն ահագնանում է, և այդ հարցում բոլորն անելիք ունեն:
«Տարբեր ոչ կարևոր մարդիկ անկարևոր հայտարարություններ են անում և դրանով գրավում մարդկանց ուշադրությունը, թուլացնում նրանց զգոնությունը, որպեսզի նրանք կարևոր թեմաներից ուղղակի շեղվեն: Այսօր կարևոր, այդ թվում՝ քաղաքական թեման դա կորոնավիրուսի դեմ համազգային պայքարն է, և այստեղ անելիք ունենք բոլորս: Մարդկանց փորձում են շփոթեցնել մեղավորների փնտրտուքով, շփոթ նետել մարդկանց առջև, որպեսզի նրանք շփոթեն ամեն ինչ: Անառարկելի է, որ ցանկացած բանի հետ կապված քաղաքական պատասխանատվությունը կրում ենք մենք՝ քաղաքական մեծամասնությունը, սա փաստ է, որից որևէ մեկը չի խուսափում»,- ասաց պատգամավորը:
Ըստ նրա՝ ճիշտ է, պատասխանատվությունը կրելու են իրենք, սակայն մեղավորությունը քաղաքական չի լինում, այլ անհատական, և նման իրավիճակում մեղավորություն ունեն բոլոր այն քաղաքացիները, որոնք պատշաճ ուշադրություն չեն դարձնում համավարակով պայմանավորված իրավիճակին, չեն դրսևորում պատշաճ վարքագիծ:
Տիգրան Ուլիխանյանը նաև նկատեց, որ մարդիկ հիմնավորում են, թե վիրուսի իրական լինելուն չեն հավատում, կամ այն իրենց չի կպնի, այս բոլոր հիմնավորումները պատգամավորի խոսքով՝ անկարևոր են: Ավելին՝ հավատը իռացիոնալ երևույթ է, և մարդիկ չեն կարող իրենց քայլերը պայմանավորել իռացիոնալ երևույթներով:
«Հասարակություն է կոչվում քաղաքացիների այն համախումբը, որտեղ շարժվում են կարգ ու կանոնով, դրանք գրված փաստաթղթեր են և մեր իրականության մեջ կոչվում են Սահմանադրություն, օրենքներ, իրավական ակտեր, այսինքն՝ պետք է հետևել օրենքին, այլ ոչ թե՝ հավատին: Ես ներողություն եմ խնդրում մեր այն բոլոր հայրենակիցներից, որոնց մոտ մենք մեր քայլերով կամ հայտարարություններով շփոթ ենք առաջացրել, դրանով եկեք փակենք այս անկարևոր թեման»,- հավելեց նա:
Հարցին՝ ՀՀ-ում կա՞ն անկարևոր մարդիկ, պատգամավորը պատասխանեց, որ իր սուբյեկտիվ կարծիքով՝ Հայաստանում շատ անկարևոր մարդիկ կան, որոնք թոփ նյուզերում են՝ իրենց կարևորություն չներկայացնող հայտարարություններով։
